Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 194 Hüküm no: 143 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Mehmed Subaşı’nın tasarrufunda olan vakıf menzil ve arsalarının kullanım hakkını damadı Mehmed Ağa b. Abdullah’a devrettiği Dâru’l-hilâfeti’l-aliyye Kostantıniyye el-mahmiyye’de Debbâğ Yunus mahallesinde sâkine zahrü’l-muvakkarât Emetullah Hâtun bt. Mehmed Subaşı’nın tarafından husûs-ı âtîye vekîl olup mezbûrenin zâtını ma‘rifet-i şer‘iyye ile ârifân olan Ahmed Çavuş b. Mahmud ve İbrahim Çelebi b. Mahmud nâm kimesneler şehâdetleri [ile] şer‘[an] vekâleti sâbite olan babası mezbûr Mehmed Subaşı meclis-i şer‘-i şerîf-i lâzimü’t-teşrîfde damadı olup müvekkile-i merkūmenin zevci işbu hâfızu’l-vesîka zahrü’l-emsâl Mehmed Ağa b. Abdullah mahzarında bi’l-vekâle ikrâr ve takrîr-i kelâm edip kızım müvekkile-i mezbûrenin yedinde ve taht-ı tasarrufunda olup mahalle-i mezbûrede vâki‘ bir tarafı Medîne-i Münevvere Vakfı olup İmâmzâde Mehmed Efendi tasarrufunda olan menzil ve bir tarafı yine vakf-ı mezbûrdan merkūm Mehmed Ağa tasarrufunda olan menzil ve bir tarafı yine vakf-ı mezbûrdan Mustafa Çelebi tasarrufunda olan menzil ve bir tarafı tarîk-ı âm ile mahdûd olup Medîne-i Münevvere alâ münevvirihâ efdalü’t-tahiyye vakfına senede altmış akçe mukāta‘ası olup tûlen ve arzan sekiz yüz seksen zirâ‘ arsadan tûlen yirmi beş zirâ‘ binâsı mülkü ve hakkı olmak üzere mezbûr Mehmed Ağa ihdâs eylediği fevkānî oda saçağına varınca arzan on bir zirâ‘ ve matbah cânibinde arzan sekiz zirâ‘ ki be-hesâb-ı şatrancî iki yüz otuz yedi zirâ‘ senede yirmi akçe mukāta‘alı arsayı eski sokak kapısı ile bi-cümleti’t-tevâbi‘ ve’l-levâhık beş bin akçe bedel mukābilesinde mezbûr Mehmed Ağa’ya vakf-ı mezbûr mütevellîsi izni ve ma‘rifetiyle vekâletim hasebiyle ferâğ ve tefvîz ve teslîm ol dahi tefevvüz ve kabûl eyledikden sonra bedel-i ferâğ olan meblağ-ı mezbûr beş bin akçeyi tamâmen mezbûr Mehmed Ağa yedinden vekâleten ahz u kabz eyledim ba‘de’l-yevm arsa-i mahdûde-i mezbûre merkūm Mehmed Ağa’nın hakk-ı müfevvazıdır dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’r-râbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Kıdvetü’l-a‘yân Ali Ağa b. Mustafa, İsmail Çelebi b. el-Hâc Mahmud matlabcı, Salih Efendi el-kâtib, Ahmed Çelebi b. Abdurrahman, Osman Beşe çukadâr, İbrahim Bey b. Ömer el-cündi, Ahmed Çavuş b. Mahmud, Halil Bey b. Mustafa.