Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 195 Hüküm no: 144 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin Kâtib Hüsrev mahallesindeki yarım menzil hissesini babası Ataullah Çelebi’ye sattığı Mahmiye-i İstanbul’da Kâtib Hüsrev mahallesinde sâkin Mehmed Çelebi b. Atâullah Çelebi meclis-i şer‘-i hatîr-i lâzimü’t-tevkīrde babası işbu râfi‘ü’l-kitâb mezkûr Atâullah Çelebi mahzarında tav‘an ikrâr ve i‘tirâf edip mahalle-i mezbûrede vâki‘ bir tarafdan el-Hâc Kasım Vakfı’ndan olan menzil ve bir tarafı Câbî Kızı demekle ma‘rûfe Hadice bt. ( ) mülküne ve iki tarafdan tarîk-ı âmma müntehî iki bâb fevkānî ve iki bâb tahtânî odaları ve altında mahzeni ve bir matbahı ve tahta-pûşu ve bir köşkü ve bir su kuyusunu ve muhavvatayı müştemil cemî‘ mülk menzilden nısf-ı şâyi‘i babam mezkûr Atâullah Çelebi’nin yedinde mülk ve hakkı ve nısf-ı şâyi‘-i âharı zikri âtî akdin sudûruna değin benim mülk ve hakkım olmağla menzil-i mezkûrda benim mülküm olan nısf-ı şâyi‘ini kâffe-i hukūk ve merâfıkıyla babam mezbûr Atâullah Çelebi’ye altmış bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyleyip semeni olan meblağ-ı mezbûrun kırk beş bin akçesini mukaddemâ babam mezbûr Atâullah Çelebi yedinden ahz u kabz edip mâ‘adâsı olan on beş bin akçeyi dahi hâlâ babam mezbûr Atâullah Çelebi yedinden tamâmen ahz u kabz eyledim ba‘de’l-yevm menzil-i mezkûrda benim mülk ve hakkım olan nısf-ı şâyi‘i babam mezbûr Atâullah Çelebi’nin mülk-i müşterâsı ve hakk-ı sırfıdır keyfe [mâ yeşâ] ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Umdetü’l-müderrisîni’l-kirâm Ömer Efendi b. Sadi, Fahrü’l-akrân Abdurrahman Efendi b. Mahmud Efendi, Zahrü’l-müderrisîn Hüseyin Efendi b. Resul, Zahrü’l-kuzât Menteşzâde Abdurrahman, Yusuf Efendi b. Osman el-imâm ve gayruhüm mine’l-[hâzırîn.]