Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 196 Hüküm no: 145 Orijinal metin no: [21b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Mehmed’in mülk menzilini on bin akçeye Mehmed Ağa b. Abdülmennan’a sattığı Mahmiye-i İstanbul’da Debbâğ Yunus mahallesinde sâkine Sâliha Hâtun bt. Mehmed’in zevci ve tarafından husûs-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân Ahmed b. Mehmed ve İbrahim Beşe b. Mahmud şehâdetleri ile şer‘an vekâleti sâbite olan Mehmed Ağa b. Abdullah meclis-i şer‘-i hatîr-i lâzimü’t-tevkīrde bi’l-fi‘il Rumeli kādıasekri olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘u’l-fezâil menbû‘u’l-efâzil alemü’l-ilm ve hüdâ menâru’l-fazl ve’t-tukā es-Seyyid Mehmed Emin Efendi b. el-mevlâ’l-merhûm Sun‘î Efendi hazretlerinin kethüdâları olan umdetü’l-emâcid ve’l-a‘yân Mehmed Ağa b. Abdülmennân mahzarında bi’l-vekâle tav‘an ikrâr ve i‘tirâf edip müvekkilem mezbûre Sâliha Hâtun silk-i mülkünde münselik yedinde mülk ve hakkı olup mahalle-i mezbûrede vâki‘ iki tarafdan mûmâ-ileyh Mehmed Ağa mülküne ve bir tarafdan Usta Kadın demekle ma‘rûfe ( ) Hâtun mülküne ve bir tarafdan tarîk-ı âmma müntehî bir bâb tahtânî odayı ve bir ahırı ve cüneyneyi ve kenîfi müştemil olan cemî‘ mülk menzilini kâffe-i hukūk ve merâfıkıyla mukaddemâ mûmâ-ileyh Mehmed Ağa’ya on bin fıddî râyic fi’l-vakt [22a] akçeye bey‘-i bâtt-ı sahîh-i şer‘î ile bey‘ ve teslîm edip onlar dahi minvâl-i meşrûh üzere iştirâ ve tesellüm eyledikden sonra semeni olan meblağ-ı mezbûrun dört bin akçesini mukaddemâ mûmâ-ileyh Mehmed Ağa yedinden ahz u kabz edip mâ‘adâsı olan altı bin akçeyi dahi hâlâ mûmâ-ileyh Mehmed Ağa yedinden bi’t-tamâm ahz u kabz eyledi ba‘de’l-yevm menzil-i mahdûd-ı mezkûru mûmâ-ileyh Mehmed Ağa’nın mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde vekîl-i mezbûr Mehmed Ağa’yı vech-i meşrûh üzere bi’l-vekâle cârî ve sâdır olan ikrârında el-mukarru lehü’l-mezbûr Mehmed Ağa vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Çavuş b. Mahmud, Fahrü’l-kuzât Çalık Mehmed Efendi, İbrahim Çelebi b. Mahmud, Mahmud Çelebi b. Ramazan, Halil Bey b. Abdullah, Mehmed Çelebi b. Haydar, el-Hâc Ca‘fer b. Abdullah ve gayruhüm mine’l-[hâzırîn.]