Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 196 Hüküm no: 146 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Metrepolidi olan Kalyo v. Argiri’nin Mehmed Ağa b. Abdullah’a 76.500 akçe borcu olduğunu ikrar ettiği Hâlâ mahrûse-i Bursa keferesinin metrepolidi olan Kalyo v. Argiri nâm râhib meclis-i şer‘-i hatîr-i lâzimü’t-tevkīrde mahmiye-i İstanbul hısnı ebvâbından Yenikapı dâhilinde sâkin fahrü’l-akrân işbu bâ‘isü’l-kitâb Mehmed Ağa b. Abdullah mahzarında bi’t-tav‘i’s-sâf ikrâr ve i‘tirâf edip merkūm Mehmed Ağa’ya cihet-i deyn-i şer‘îden târih-i kitâb senesi şehr-i Ramazân gurresinden yüz seksen gün tamâmına dek müeccel ve mev‘ûd beş yüz kıt‘a riyâlî guruş ile otuz bir bin beş yüz fıddî râyic fi’l-vakt akçe ki cem‘an akçe hesabınca yetmiş altı bin beş yüz akçe merkūm Mehmed Ağa’ya zimmetimde vâcibü’l-kazâ deynim vardır dedikde mukırr-ı mezbûru ikrâr-ı meşrûhunda el-mukarru lehü’l-merkūm Mehmed Ağa vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Çelebi b. Şeyhî Mehmed Çelebi, Receb Çelebi b. Sinan el-hammâmî, Hüseyin b. Abdullah, Yunus b. Nuh, Mehmed b. el-Hâc Rıdvan, Süleyman Beşe b. Abdullah, İbrahim Bey b. Ali, Osman Beşe çukadâr ve gayruhüm mine’l-[hâzırîn.]