Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 197 Hüküm no: 147 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Aslan v. Baryam’ın alacak hususunda vasisi Mosi v. Aslan ile on dört guruş üzerine sulh olduğu Medîne-i Selanik sükkânından olup Erguvan cemâ‘atinden Aslan v. Baryam nâm Yahudi mahfil-i kazâda yine cemâ‘at-i mezbûreden işbu bâ‘isü’s-sifr Mosi v. Aslan nâm Yahudi muvâcehesinde ikrâr ve takrîr-i kelâm edip mezbûr Mosi hâl-i sıgārımda kıbel-i şer‘den mansûb vasîm olmağla babam mezbûr Baryam’dan müntakil yedinde dört yüz kıt‘a riyâlî guruşum olup hâlâ ben bâliğ ve reşîd olmağla meblağ-ı mezbûr dört yüz kıt‘a riyâlî guruşu mezbûr Mosi’den da‘vâ ve taleb eylediğimde inkâr etmekle beynimizde münâza‘ât-ı kesîre vâkı‘a olmuşidi hâlâ vesâtat-ı muslihîn ile da‘vâ-yı mezbûremden benimle mezbûr Mosi on dört kıt‘a riyâlî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on [dört] riyâlî guruşu yedinden tamâmen ahz u kabz edip mâ‘adâ da‘vâsından mezbûr Mosi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d mezbûr Mosi ile husûs-ı mezbûra müte‘allika bi-vechin mine’l-vücûh ve sebebin mine’l-esbâb da‘vâ ve nizâ‘ım kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali Bey el-cündi, Osman Beşe çukadâr, Mehmed Çavuş, İsmail Çelebi ve gayruhüm mine’l-[hâzırîn.]