Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 197 Hüküm no: 148 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa b. Şaban’ın Rus asıllı kölesi Hasan’ı azat ettiği Bi’l-fi‘il şahincibaşı olan umdetü’l-emâcid ve’l-ekârim Abdürrahim Ağa’nın kethüdâları olup mahmiye-i İstanbul’da Tercümân Yunus mahallesinde sâkin zahrü’l-emsâl Süleyman Ağa b. Şa‘ban tarafından zikri âtî i‘tâk ve tahrîri ikrâra vekîl [ve] vekâleti mahalle-i mezbûre sükkânından İbrahim Bey b. Mehmed ve Salih Bey b. Abdullah nâm kimesneler şehâdetleri ile şer‘an sâbite olan Hüseyin Bey b. Mahmud meclis-i şer‘-i hatîr-i lâzimü’t-tevkīrde bi’l-vekâle takrîr-i kelâm ve ta‘bîr-i meram edip müvekkil-i mezbûr Süleyman Ağa kendiye rıkkını mu‘terif olan işbu uzun boylu açık kaşlı elâ gözlü Rusiyyü’l-asl bâ‘isü’l-vesîka Hasan b. Abdullah nâm şâbb-ı emred abd-i memlûkünü hasbeten lillâhi’l-aliyyi’l-a‘lâ ve taleben li-merzâti rabbihî’l-a‘lâ tahrîr ve i‘tâk ve silk-i ahrâr-ı asliyyîne idrâc ve ilhâk eyledi ba‘de’l-yevm mezbûr Hasan sâir ahrâr-ı asliyyîn gibi hür olup üzerinde [hakk-ı] velâdan gayrı hakkım bâkī kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi el-kâtib, Salih Ağa kethüdâ, Mehmed Bey el-cündi, Mustafa Bey b. Ahmed, el-Hâc Mahmud muhzır, Mehmed Bey el-cündi, Ahmed Efendi el-kâtib, Mehmed Efendi el-kâtib ve gayruhüm mine’l-[hâzırîn.]