Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 198 Hüküm no: 149 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadırga Limanı’nda öldürülen Duka v. Lazari’nin tek varisinin kardeşi Apostol v. Lazari olduğu Mahmiye-i İstanbul’da Kadırga Limanı’nda vâki‘ Esir Hanı’nda târih-i kitâbdan dört gün mukaddem mecrûhan hâlik olan Duka v. Lazari nâm zimmînin li-ebeveyn er karındaşı işbu bâ‘isü’s-sifr Apostol nâm zimmîden vech-i âtî üzere istihbâr-ı şer‘î sudûrundan sonra udûl-i Müslimînden olup Vilâyet-i Anadolu’da Trabzon kasabasında Kabak Meydânı kurbünde İmâret mahallesinde sâkin olup hâlâ mahmiye-i İstanbul’da Unkapanı dâhilinde na‘lçacı olan Ahmed Beşe b. Hasan ve yine kasaba-i mezbûre sükkânından olup hâlâ mahmiye-i mezbûrede Kumkapı kurbünde vâki‘ Nişancı Paşa-yı atîk mahallesi sükkânından Yahya b. Bayram nâm kimesneler li-ecli’l-ihbâr meclis-i şer‘a hâzırân olup isre’l-istihbâri’ş-şer‘î fi’l-hakīka zikri mürûr eden Esir Hanı’nda târih-i mezbûrda mecrûhan maktûl bulunan mezbûr Duka’nın zevcesi olup kasaba-i mezbûrede Kâfir Meydânı kurbünde sâkine Susanna bt. Praşkova nâm Nasrâniye târih-i kitâbdan beş ay mukaddem hâlike olup hâlike-i mezbûre kasaba-i mezbûrede papasları Ayomarta demekle ma‘rûf kenîsede âyîn-i bâtılları üzere bizim huzûrumuzda defn eylemişlerdir ol vechile maktûl-i mezbûrun verâseti müstahbir-i mezbûr Apostol’a münhasıra olup gayrı vârisi olduğu ma‘lûmumuz değildir deyu her biri alâ tarîkı’ş-şehâde haber vermeğin vâki‘u’l-hâl müstahbir-i mezbûr Apostol talebiyle ketb ve yedine def‘ olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, Mustafa Efendi el-kâtib, Mehmed Çelebi b. Haydar, Ömer b. Abdullah.