Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 199 Hüküm no: 150 Orijinal metin no: [22a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyni bt. Hacı Kaya’nın babasından kalan miras hissesi hususunda kardeşi Hacı Mehmed’in zimmetini ibra ettiği Mahmiye-i İstanbul’da Üskübi mahallesinde sâkin iken bundan akdem vefât eden el-Hâc Kaya b. İbrahim’in verâseti zevce-i metrûkesi Arzi Hâtun bt. Yolcu ile sulbî kebîr oğlu Hâcı Mehmed ve sulbiye kebîre kızı Zeyni nâm hâtuna münhasıra olduğu şer‘an zâhir ve müte‘ayyin oldukdan sonra mezbûre Zeyni Hâtun meclis-i şer‘-i hatîr-i lâzimü’t-tevkīrde müteveffâ-yı mezbûrun terekesine vâzı‘u’l-yed olan li-ebeveyn karındaşı bâ‘isü’l-vesîka merkūm Hâcı Mehmed mahzarında bi’t-tav‘i’s-sâf ikrâr ve i‘tirâf edip babam müteveffâ-yı mezbûrun mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd büyûtu hâvî mülk menzili semeninden benim hisse-i şer‘iyyeme isâbet eden on sekiz bin akçeyi ve yine babam müteveffâ-yı mezbûrun nukūdundan dahi hisse-i şer‘iyyeme isâbet eden yirmi bir bin nakid akçe ve muhallefâtından dahi isâbet eden bir mâ’î kutnî kaftan ve bir bogası kaftan ve bir yemeni yorgan ve bir kebe ve bir velense ve dört sahan ve bir tas ve bir tencere ve bir kahve ibriği ve bir el ibriği ve sâir esâs-ı beyt ve evânî-i nuhâsiyye ve gayr-ı nuhâsiyye ve bi’l-cümle ism-i mâl ıtlâk olunur kalîl ve kesîr ve celîl ve hakīr cemî‘ eşyâsından dahi bana isâbet ve intikāl eden hisse-i şer‘iyyemi terekesine vaz‘-ı yed eden karındaşım mezbûr Hâcı Mehmed yedinden tamâmen ahz u kabz eyledim babam müteveffâ-yı mezbûrun ile’l-vefât taht-ı tasarrufunda olup arsasının senede merhûm Çâker Ağa Vakfı’na elli akçe mukāta‘ası olup binâsı mülkü olan ma‘lûmü’l-hudûd iki bâb kundakçı dükkânlarından gayrı karındaşım mezbûr Mehmed kıbelinden vechen [22b] mine’l-vücûh ve sebeben mine’l-esbâb da‘vâ ve nizâ‘ım kalmadı eğer ba‘de’l-yevm babam müteveffâ-yı mezbûrun zikri mürûr eden iki bâb kundakçı dükkânlarından gayrı terekesine müte‘allika da‘vâ benden karındaşım mezbûr Hâcı Mehmed üzerine sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Muharrem, Osman Beşe çukadâr, Mehmed Çelebi b. Haydar, İsa Bey b. Ahmed ve gayruhüm mine’l-[hâzırîn.]