Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 199 Hüküm no: 151 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütçü Nikola v. Dimitri’nin guruşa dönüştürmek için Serkis v. Simavon’a verdiği beş bin akçesinin kendisine iadesi Sütçü tâifesinden olup mahmiye-i İstanbul’da Aksaray kurbünde vâki‘ sütçü kârhânesi müste’ciri olan bâ‘isü’s-sifr Nikola v. Dimitri nâm zimmî meclis-i şer‘-i hatîr-i lâzimü’t-tevkīrde ekmekçi tâifesinden Serkis v. Simavon nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan otuz üç gün mukaddem guruşa tebdîl etmek için malımdan mezbûr Serkis yedine beş bin akçe def‘ ve teslîm ol dahi vech-i muharrer üzere yedimden ahz u kabz eyledikden sonra guruşa tebdîl etmeyip yedinde kalmağın hâlâ meblağ-ı mezbûr beş bin akçeyi mezbûr Serkis’den taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûr Nikola’dan müdde‘âsını mübeyyine beyyine taleb olundukda yine sütçü tâifesinden olup Aksaray’da sâkin Nikola v. Kuzma ve İstiko v. Yorgi nâm zimmîleri li-ecli’ş-şehade meclis-i şer‘a hâzırân olup isre’l-istişhâdi’ş-şer‘î fi’l-vâki‘ müdde‘î-i mezbûr Nikola guruşa tebdîl etmek için târih-i mezbûrda merkūm Serkis yedine mâlından bizim huzûrumuzda beş bin akçe def‘ ve teslîm ol dahi yedinden ahz u kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde şâhidân-ı mezbûrân yine sütçü tâifesinden Sebat v. Dimitri ve Todori v. İstati ve Dimitri v. Yorgi ve Hıristo v. İsterati ve Argiri v. Yorgi ve Yorgi v. İvejo nâm zimmîlerden suâl olundukda onlar dahi herbirisi merkūmânın hüsn-i hâllerini ve makbûlü’ş-şehâde olduklarını haber verdiklerinden sonra şehâdetleri hayyiz-i kabûlde vâkı‘a olmağın mûcibiyle meblağ-ı mezbûr beş bin akçeyi müdde‘î-i mezbûr Nikola’ya edâ ve teslîme mezbûr Serkis’e tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İsa Bey b. Ahmed, İbrahim Bey b. Ömer, Ahmed Efendi el-kâtib ve gayruhüm mine’l-[hâzırîn.]