Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 201 Hüküm no: 153 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Çelebi b. Mehmed’in Mısırlı Yanaki v. Mihalaki’den beş yüz guruş ve otuz bin akçe alacağı olduğu Mahmiye-i İstanbul’da merhûm Şeyh Ebî’l-Vefâ kurbünde Molla Gürânî mahallesi ahâlîsinden Musa Çelebi b. Mehmed meclis-i şer‘-i hatîr-i lâzimü’t-tevkīrde tüccâr tâifesinden Mısırlı Yanaki v. Mihalaki nâm zimmî mahzarında üzerine takrîr-i da‘vâ edip mezbûr Yanaki zimmetinde cihet-i karz-ı şer‘îden bin yüz riyâlî guruşla otuz bin fıddî râyic fi’l-vakt akçe hakkım olup meblağ-ı mezbûrun altı yüz riyâlî guruşunu mezbûr Yanaki yedinden ahz u kabz edip mâ‘adâsı olan beş yüz guruşla otuz bin akçe hakkım hâlâ zimmetindedir suâl olunup alıverilmesi matlûbumdur dedikde gıbbe’s-suâl mezbûr Yanaki cevâbında fi’l-hakīka müdde‘î-i mezbûr Musa Çelebi’ye cihet-i mezkûreden zimmetimde bin yüz riyâlî guruşla otuz bin akçe deynim olup meblağ-ı mezkûrun altı yüz guruşunu kendiye edâ ve îfâ edip mâ‘adâsı olan beş yüz riyâlî guruşla otuz bin akçe hâlâ zimmetimde mezbûr Musa Çelebi’ye lâzimü’l-edâ ve vâcibü’l-kazâ deynimdir deyu bi-tav‘ihî ikrâr ve i‘tirâf etmeğin ikrârı mûcebince meblağ-ı bâkī beş yüz guruşla otuz bin akçeyi müdde‘î-i mezbûra edâ ve teslîme mezbûr Yanaki üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Çavuş b. Ca‘fer, Abdurrahman Çavuş, Bostancı Ali bey b. Mehmed, el-Hâc Ca‘fer b. Abdullah, Ali Beşe çukadâr, Mehmed Efendi el-kâtib ve gayruhüm mine’l-[hâzırîn.]