Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 201 Hüküm no: 154 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râziye bt. Musa Efendi’nin Gürcü asıllı cariyesi Timurhan’ı azat ettiği Mahmiye-i İstanbul’da Mimar Sinan mahallesinde sâkine Râziye bt. Musa Efendi nâm hâtunun li-ebeveyn kız karındaşı ve tarafından i‘tâk-ı âti’z-zikri ikrâra vekîl olup mezbûreyi ma‘rifet-i şer‘iyye ile ârifân olan Ahmed Efendi b. Mehmed ve Mehmed Dede b. İvaz şehâdetleri ile şer‘an vekâleti sâbite olan Rahime Hâtun meclis-i şer‘-i hatîr-i lâzimü’t-tevkīrde bi’l-vekâle tav‘an ikrâr ve i‘tirâf edip müvekkilem mezbûre Râziye Hâtun zikri âtî i‘tâkın sudûruna değin silk-i mülkünde muntazam yedinde mülk ve hakkı olup rıkkını kendiye mu‘terife olan açık kara kaşlı orta boylu esmerü’l-levn Gürciyyetü’l-asl Müslimetü’l-mille Timurhan bt. Abdullah nâm memlûke câriyesini hasbeten lillâhi te‘âlâ ve hasbeten li-rûhi resûlihî’l-mu‘allâ mâlından i‘tâk ve tahrîr edip sâir harâir-i asliyyâta idrâc ve ilhâk eyledi min ba‘d mezbûre Timurhan sâir harâir-i asliyyât gibi hürredir üzerinde hakk-ı velâdan gayrı hakkım kalmadı dedi dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Çavuş b. Abdullah, Ahmed Efendi el-imâm, Ali Efendi el-kādî, Hasan Çelebi b. Abdullah, Halil b. Abdullah, Ahmed Çelebi kethüdâ ve gayruhüm mine’l-[hâzırîn.]