Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 203 Hüküm no: 157 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lalegül bt. Abdülmennan’ın kocası Mehmed Çelebi b. Hacı Sefer’den boşandığı (Muhâla‘a) Mahmiye-i İstanbul’da Kalenderhâne mahallesi sâkinelerinden Lalegül bt. Abdülmennân nâm hâtun meclis-i şer‘-i hatîr-i lâzimü’t-tevkīrde zevc-i dâhil-bihâsı olan sâhibü hâze’l-kitâb Mehmed Çelebi b. El-Hâc Sefer ile nikâhı ma‘kūd olup zevci merkūm Mehmed Çelebi zimmetinde mütekarrir olan iki bin râyic fi’l-vakt akçe mehr-i müecceli ve nafaka-i iddet-i mu‘ayyenesi ve meûnet-i süknâsı üzerine muhâla‘a-i sahîha-i şer‘iyye ile muhâla‘a edip merkūm Mehmed Çelebi dahi minvâl-i meşrûh üzere muhâla‘a eyledikden sonra herbiri âharın zimmetini târih-i kitâba gelince zevciyyete ve sâir husûsa müte‘allik âmme-i de‘âvâdan ibrâ-i âmm-ı kātı‘u’n-nizâ‘la ibrâ ve ıskāt eyleyip min ba‘d mezkûrân Lalegül ve Mehmed Çelebi beynlerinde talâk-ı bâyin ile beynûnet vâkı‘a olmağın mâ-hüve’l-vâki‘ bi’t-taleb ketb olundu. Tahrîren fi’l-yevmi’l-âşir min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Çelebi b. Mehmed Ağa, Osman Halîfe müezzin-i Kalenderhâne, Ali Efendi el-müderris, Ahmed Çelebi b. Yahya el-kādî, Osman Beşe b. Sevindik ve gayruhüm mine’l-huzzâr.