Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 208 Hüküm no: 163 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Ramazan’ın Opar kasabasındaki bazı bağlarını İbrahim Bey b. Ali’ye satıp bazı tarlalarının da kullanım hakkını devrettiği Vilâyet-i Rumeli’nde Opar kasabası sükkânından Ali Bey b. Ramazan mahfil-i kazâda kasaba-i mezbûre sükkânından işbu bâ‘isü’l-kitâb İbrahim Bey b. Ali mahzarında ikrâr ve takrîr-i kelâm edip silk-i mülk-i sahîhimde münselik olup kasaba-i mezbûrede vâki‘ bir tarafı İsa nâm kimesne bağına ve bir tarafı Ebûbekir menziline ve bir tarafı kasaba-i mezbûre avarızına vakıf bağa ve bir tarafı Osman nâm kimesne bostanına müntehî mülk arsa-i hâliyemi ve yine kasaba-i mezbûrede İstirande nâm mevzi‘de vâki‘ bir tarafı vâdi ve bir tarafı mezkûr İsa bağı ve bir tarafı müşterî-i mezbûr İbrahim bağı ve bir tarafı tarîk-ı âm ile mahdûd üç kıt‘a mülk bağımı ve yine karye-i mezbûrede dere kurbünde vâki‘ bir tarafı Nasûh b. İsa bağına ve bir tarafı dere ve bir tarafı arsa-i hâliye ve bir tarafı tarîk-ı âm ile mahdûd bir kıt‘a mülk bağımı ve yine karye-i mezbûrede vâki‘ bir tarafı mezbûr Nasûh Beşe bağına ve bir tarafı Kasım Ağa bağına ve bir tarafı Mehmed b. Ebûbekir tarlasına ve bir tarafı Ali Beşe veresesi tarlalarına müntehî bir kıt‘a küçük bağımı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bin iki yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Bey’e bey‘ ve teslîm ol dahi iştirâ ve kabûl eyledikden sonra yine kasaba-i mezbûre sınırı dâhilinde vâki‘ lede’l-ahâlî ve’l-cîrân herbirinin hudûdu ma‘lûme olup mevzi‘-i müteferrikada vâki‘ ( ) kıt‘a tarlalarımı dahi ma‘rifet-i arz ile bin akçe bedel mukābilesinde mezbûr İbrahim Bey’e ferâğ ve tefvîz ol dahi tefevvüz ve kabûl eyledikden sonra semeni olan meblağ-ı mezbûr bin iki yüz akçe ile bedel-i ferâğ olan meblağ-ı mezbûr bin akçe ki cem‘an iki bin iki yüz akçeyi mezbûr İbrahim Bey yedinden tamâmen ahz u kabz edip emlâk-i mezbûre ile arâzi-i merkūmeyi mahallinde zabt u tasarrufa mezbûr İbrahim Bey’i taslît eyledim dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hasan b. Abdullah, Davud b. Abdülkerim, Derviş b. Mehmed, Mustafa b. Mehmed, Bayram b. Mehmed, Osman b. ( ) kapıcı, Osman Beşe çukadâr, İbrahim Bey b. Ömer, Ca‘fer Bey b. Abdullah ve gayruhüm.