Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 209 Hüküm no: 164 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görice kazası ahalisinin kendileriyle husumeti olan Sinan Bey’i İstanbul’a götürmek için mübaşir tayin ettirdikleri Ramazan Çavuş b. Yahya ile ücret hususunda çıkan anlaşmazlıkta sulh oldukları Dergâh-ı âlî dâme mahfûfen bi’l-me‘âlî çavuşlarından Ramazan Çavuş b. Yahya meclis-i şer‘-i hatîr-i lâzimü’t-tevkīrde Vilâyet-i Rumeli’nde Görice kazâsı ahâlîsinden ma‘lûmü’l-esâmi kimesneler taraflarından husûs-ı âti’l-beyâna vekîl-i sâbitü’l-vekâleleri olan kazâ-i mezbûr ahâlîsinden İdris Ağa b. Salih ve Mehmed Beşe b. Ali mahzarlarında ikrâr ve i‘tirâf edip kazâ-i mezbûr ahâlîsinin yine kazâ-i mezbûrede sâkin Sinan Bey nâm kimesne ile beynlerinde ma‘lûm husûs için da‘vâ ve husûmetleri olup bundan akdem mezbûr Sinan Bey’i Âsitâne-i sa‘âdete ihzâr için emr-i şerîfle beni mübâşir ta‘yîn etdirdiklerinde Âsitâne-i sa‘âdete mezbûr Sinan Bey’i götürmek için benim ile yüz guruş ücret kavl edip ben dahi kazâ-i mezbûra vardığımdan mezbûr Sinan Bey’i Âsitâne-i sa‘âdete ihzâr sadedinde iken mezbûr Sinan Bey’in gelmemesi için emr-i şerîf vârid olup imtisâlen li’l-emri’l-âlî mezbûru Âsitâne’ye ihzâr etmemekle vekîlân-ı mezbûrân benim [ile] kavl etdikleri ücretimi vermede te‘allül ve bahâne ettiklerinde beynimize muslihûn tavassut edip ücret-i mezkûreden beni üç bin fıddî râyic fi’l-vakt akçe üzerine sulh ettiklerinde ben dahi sulh-ı mezbûru kabûl edip bedel-i sulh olan meblağ-ı mezbûrun bin üç yüz akçesini mukaddemâ kazâ-i mezbûr ahâlîsinden Hüseyin b. Mehmed nâm kimesne yedinden ahz u kabz edip mâ‘adâsı olan bin yedi yüz akçeyi hâlâ vekîlân-ı mezbûrân İdris Ağa ve Mehmed Beşe yedlerinden tamâmen ahz u kabz eyledim ba‘de’l-yevm zikrolunan yüz guruş ücret da‘vâsına müte‘allik kazâ-i mezbûr ahâlîsi üzerlerine bi-vechin mine’l-vücûh ve sebebin mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa b. Oruc mübâşir, Osman Beşe çukadâr, İsa Bey b. Ahmed, el-Hâc Ca‘fer b. Abdullah ve gayruhüm mine’l-[hâzırîn.]