Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 209 Hüküm no: 165 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Preşkova’nın tasarrufunda olan vakıf nalçacı dükkânındaki kiracısı Ali b. Abdullah’ın oğulları tarafından dükkandan çıkarıldığı Mahrûse-i Galata kazâsına tâbi‘ Arnavudköyü’nde sâkin iken bundan akdem hâlik olan Preşkova v. ( ) nâm zimmînin verâseti sulbî kebîr oğulları Kostantin ve Yanaki nâm zimmîlere münhasıra olduğu şer‘an zâhir ve müte‘ayyin oldukdan sonra işbu râfi‘ayi’s-sifr mezbûrân Kostantin ve Yanaki meclis-i şer‘-i hatîr-i lâzimü’t-tevkīrde Ali b. Abdullah nâm kimesne mahzarında herbiri üzerine da‘vâ ve takrîr-i kelâm edip babamız hâlik-i mezbûrun ile’l-helâk tasarrufunda olup merhûm Âhi Çelebi Vakfı’na beher mâh onar akçe ücret-i müeccelesi olup mahmiye-i İstanbul hısnı ebvâbından Unkapanı kurbünde vâki‘ lede’l-ahâlî ma‘lûmü’l-hudûd bir bâb na‘lça dükkânı ba‘de helâkihî bize intikāl-i âdî ile intikāl eyledikden sonra dükkân-ı mezbûru merkūm Ali’ye beher mâh yüzer akçeye ücretle îcâr ve teslîm ol dahi istîcâr ve tesellüm eylemişidi hâlâ târih-i kitâb şehri gurresinden mezbûr Ali ile fesh-i akd-i icâre edip dükkân-ı mezbûrdan mezbûr Ali’yi ihrâc murâd eylediğimizde imtinâ‘ eder suâl olunup ihrâcına tenbîh olunmak matlûbumuzdur dediklerinde gıbbe’s-suâl mezbûr Ali kaziyye bâlâda tafsîli mürûr ettiği vech üzere idiğini mu‘terif olmağın mûcibiyle dükkân-ı mezbûrdan çıkıp âhar yere nakl etmek için mezbûr Ali’ye tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Beşe b. ( ) çukadâr, Osman Beşe çukadâr, Mehmed b. Haydar, İbrahim b. Ömer ve gayruhüm mine’l-[hâzırîn.]