Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 210 Hüküm no: 166 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Ali’nin kendisini dövüp eşyasını gasbettiği iddiasıyla Abdulbaki Beşe b. Halil aleyhine açtığı davada iddiasını ispat edemediği Mahmiye-i İstanbul’da Edirnekapısı kurbünde sâkin Osman Beşe b. Ali meclis-i şer‘-i hatîr-i lâzimü’t-tevkīrde mahmiye-i mezbûrede Mustafa Paşa Çarşısı’nda vâki‘ kollukda yasakçı olan işbu hâmilü’l-kitâb Abdulbâki Beşe b. Halil muvâcehesinde üzerine da‘vâ edip mezbûr Abdülbaki Beşe târih-i kitâbdan üç gün mukaddem bi-gayrı hakkın sağ gözümün üzerine ve burnuma yumruk ile darb ve mecrûh eylediğinden gayrı silk-i mülkümde münselik iskarlet mâ’î sirvâlimi ahz eylemişdir suâl olunup mûcib-i şer‘îsi icrâ olunması matlûbumdur dedikde gıbbe’s-suâl mezbûr Abdulbâki Beşe cevâbında husûs-ı mezbûru bi’l-külliyye inkâr edicek merkūm Osman Beşe’den sıdk-ı makāline beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka mezbûr Osman Beşe’yi târih-i mezbûrda sağ gözünün üzerine ve burnuna darb ve mecrûh eylemediğine ve sâlifü’z-zikr sirvâlini ahz u kabz etmeyip el-ân müdde‘î-i mezbûrun kendi üzerinde bir vechile hakkı olmadığına merkūm Abdulbâki Beşe’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin bî-vech mu‘ârazadan men‘ birle mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi b. Salih el-kâtib, Ahmed Efendi b. Mehmed, Mehmed Beşe b. Hasan, Ali Beşe çukadâr ve gayruhüm mine’l-[hâzırîn.]