Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 211 Hüküm no: 167 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Derviş Mehmed’in tasarrufunda olan vakıf menziline haksız yere müdahale ettiği iddiasıyla Nalcı Hacı Rıdvan b. Abdülmennan aleyhine açtığı davada iddiasını ispat edemediği Ebî Eyyûb-i Ensârî aleyhi’r-rahmetü’l-meliki’l-bârî kazâsına tâbi‘ Hasköy kasabasında Südlüce nâm mevzi‘de sâkine olan Âişe bt. Derviş Mehmed nâm hâtun meclis-i şer‘-i hatîr-i lâzimü’t-tevkīrde mahmiye-i İstanbul’da Kalenderhâne mahallesinde vâki‘ zikrî âtî vakf[ın] hasbî mütevellîsi olup tevcîh-i hâkimü’ş-şer‘le hâlâ içinde sâkin olan sâhibü hâze’l-kitâb Na‘lcı el-Hâc Rıdvan b. Abdülmennân mahzarında üzerine takrîr-i da‘vâ edip zikrolunan Kalenderhâne mahallesinde vâki‘ bir tarafdan Süleyman Ağa Vakfı’na ve bir tarafdan Davud Ağa Vakfı’na ve bir tarafdan mukaddemâ Ali nâm kimesne mülkü olup tedâvül-i eyâdî ile hâlâ Sefer Çelebi nâm kimesne mülkü olan menzile ve bir tarafdan tarîk-ı [âmma] müntehî olup büyût-ı adîdeyi müştemil olan cemî‘ menzil bundan akdem babam mezbûr Derviş Mehmed’in ile’l-vefât mülk ve hakkı olup ba‘de vefâtihî terekesinden olmağla irsle zevcesi olup vâlidem olan Rahime bt. Abdullah nâm hâtuna ve seb‘a-i esmânı …? bana intikāl edip ba‘dehû vâlidem merkūme Rahime Hâtun dahi vefât edip verâseti bana münhasıra olmağla menzil-i mahdûd-ı mezbûrda olan sümün hisse-i şâyi‘ası dahi irs-i şer‘î ile bana intikāl etmişiken merkūm el-Hâc Rıdvan cemî‘ menzil-i mezbûra bi-gayrı hakkın vaz‘-ı yed eylemişdir suâl olunup yed-i âdiyesi kasr ve izâle olunması matlûbumdur dedikde gıbbe’s-suâl merkūm el-Hâc Rıdvan cevâbında mahalle-i mezbûrede vâki‘ olup hudûd-ı mezbûre ile mahdûde olan cemî‘ menzil-i mezbûr Mehmed Bey b. Hamza Bey mülk ve hakkı olduğu hâlde vakf-ı sahîh-i şer‘î ile vakıf ve habs edip tescîl-i şer‘î ve teslîm ile’l-mütevellî ettikden sonra süknâ-yı menzil-i mezbûru evvelâ nefsine ve ba‘de vefâtihî karındaşı oğlu Hüseyin ile atîki Behram’a ba‘dehâ utekāları Âftâb ve Yasemin’e ve ba‘dehâ evladlarına ve evlâd-ı evlâdlarına ve ba‘de’l-inkırâz kendisin oğlu Mustafa b. Mehmed’e ba‘dehû evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâzi’l-kül rûhi’çün yevmî bir sûre-i Yâsin-i şerîf tilâvet etmek üzere bir mütezevvic recül-i sâliha ve muhtâc ve fakīre şart etmekle evvelâ bi-nefsihî ba‘dehû meşrûtun-lehüm hayâtda oldukları hâlde ber-mûceb-i şart-ı vâkıf sâkinler olup bi’l-külliyye vefât edip nesilleri münkariz olmağla bin yirmi bir senesi şehr-i Ramazâni’l-mübâreki’nin on dokuzuncu günü mahmiye-i mezbûrede bi’l-fi‘il kādı olan merhûm Cabbârzâde Mevlânâ Derviş Mehmed Efendi ber-mûceb-i şart-ı vâkıf menzil-i mezbûrun süknâsını ve hasbî tevliyetini bana tevcîh ve yedime hüccet-i şer‘iyye verip ol târihde Rumeli kādıaskeri olan merhûm Kemaleddin Efendi [24b] ve Anadolu kādıaskeri olan merhûm Âhizâde Hüseyin Efendi mevlânâ-yı mezbûrun tevcîhini tenfîz ve hüccet-i şer‘iyyesini herbiri imzâ buyurmuşlardır müdde‘iye-i mezbûre Âişe merkūm Derviş Mehmed’in kızı olup ve menzil-i mezbûr merkūm Derviş Mehmed’in mülkü olup vefâtından sonra vech-i meşrûh üzere merkūme Âişe’ye irs-i şer‘le intikāli ma‘lûmum değildir deyu mevlânâ-yı mezbûrun imzâsıyla mümzât ve hatemi ile mahtûme ve mazmûnu takrîrine muvâfık hüccet-i şer‘iyye ibrâz edip feth u kırâat olunup merkūme Âişe’den istintâk olundukda cevâbında merhûm el-Hâc Rıdvan’ın menzil-i mezbûru tevcîh-i hâkimü’ş-şer‘le vakıf olmak üzere sinîn-i merkūmede mutasarrıf olup ve kendisi kasaba-i mezbûrede sâkine olup bilâ-özr-i şer‘î menzil-i mezbûru da‘vâ etmeyip sükût ettiğine tav‘an mu‘terife olmağın i‘tirâfı mûcebince da‘vâ-yı meşrûhasının istimâ‘ı memnû‘ olmağın merkūme Âişe da‘vâ-yı meşrûhasından men‘ olunup mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Salih Efendi b. Salih el-kādî, Mehmed Efendi b. Veli el-kādî, el-Hâc Hüseyin b. Abdullah el-muhzır, Ahmed Çelebi b. Abdürrahim el-muhzır, Mehmed Çelebi b. ( ) tâbi‘-i Hasan Efendizâde.