Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 212 Hüküm no: 168 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. İslam’ın Ayşe Hanım bt. Hüseyin Ağa’da iki yüz elli guruş alacağı olduğu Fazîletlü efendi hazretlerinin imzâsıyladır. İşbu râfi‘ü’l-kitâb Ali Ağa b. İslam mahfil-i kazâda Âişe Hânım bt. Hüseyin Ağa tarafından husûs-ı âtîye vekîl olup mezbûreyi ma‘rifet-i şer‘iyye ile ârifân olan Hüseyin b. Abdullah ve Ahmed Çelebi b. Hüseyin nâm kimesneler şehâdetleri ile huzûr-ı hâkim-i muvakkı‘-ı kitâbda hasm-ı şer‘î-i câhid muvâcehesinde vekâleti sâbite olan umdetü’l-a‘yân İshakzâde demekle şehîr Mehmed Ağa b. Mustafa muvâcehesinde üzerine takrîr-i da‘vâ edip bin altmış üç senesinde müvekkile-i mezbûre Âişe Hânım’a iki yüz elli esedî guruş ikrâz ve teslîm ol dahi iktirâz ve tesellüm etmişidi hâlâ meblağ-ı mezbûru müvekkile-i mezbûre bana edâ ve îfâya vekîl-i mezbûra tenbîh olunmak matlubumdur dedikde gıbbe’s-suâl vekîl-i mezbûr cevâbında husûs-ı mezbûru bi’l-külliyye inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i İstanbul’da Yazıcı mahallesindesakin Hüseyin Bey b. Ali ve Suhte Sinan mahallesinde sâkin Mehmed b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezkûr Ali Ağa târih-i mezbûrda müvekkile-i mezbûre Âişe Hânım’a iki yüz elli esedî guruş ikrâz ve teslîm edip mezbûre Âişe Hânım dahi huzûrumuzda iktirâz ve kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Çavuş b. ( ), Mustafa Bey b. ( ), Ahmed Efendi el-kādî, İvaz Ağa ser-muhzırân, Mustafa b. ( ), İsa Bey b. Ahmed ve gayruhüm mine’l-[hâzırîn.]