Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 213 Hüküm no: 169 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Türkmen Mustafa Bey b. Muslı’nun Devrekani kazasında tasarrufunda bulunan tarlaların yarısına Mehmed b. İbrahim’in müdahalesinin engellenmesi Vilâyet-i Anadolu’da Kastamonu sancağında Devrekani kazâsına tâbi‘ Hisarcık nâm karyeden işbu bâ‘isü’l-kitâb Türkmen Mustafa Bey b. Muslı nâm kimesne mahfil-i kazâda zikri âtî tarlaların hâlâ sipâhîsi olan Süleyman Ağa huzûrunda Mehmed b. İbrahim nâm kimesne mahzarında üzerine takrîr-i da‘vâ edip karye-i mezbûre sükkânından Ahmed b. Ali nâm kimesne yedinde ve taht-ı tasarrufunda olup karye-i mezbûre sınırı dâhilinde Topraklık nâm mevzi‘de vâki‘ lede’l-ahâlî ma‘lûmü’l-hudûd bir kıt‘a tarla ve Ören nâm mevzi‘de vâki‘ lede’l-ahâlî ma‘lûmü’l-hudûd bir kıt‘a ve Yazı nâm mevzi‘de vâki‘ lede’l-ahâlî ma‘lûmü’l-hudûd tarla ve Hasanyeri nâm mevzi‘de vâki‘ lede’l-ahâlî ma‘lûmü’l-hudûd bir kıt‘a tarla cem‘an dört kıt‘a tarlalar bilâ-veled fevt oldukda mahlûl olmağla sâhib-i arz olan mezbûr Süleyman Ağa mahlûlünden bana bin altmış beş senesi Zilhiccesi’nin evâilinde tapu ile tefvîz edip ben dahi tefevvüz ve bu ana değin tasarruf ederken hâlâ mezbûr Mehmed zikrolunan dört kıt‘a tarlaların nısfına nâ-hak vaz‘-ı yed eder suâl olunup kasr-ı yedine tenbîh olunmasın taleb ederim deyu târih-i mezbûr ile müverraha ve mezbûr Süleyman Ağa’nın hat ve hatemini hâvî temessük ibrâz edicek gıbbe’s-suâl mezkûr cevâbında fi’l-hakīka zikrolunan tarlalar müteveffâ-yı mezbûrun tasarrufunda olup bilâ-veled fevt oldukda mahlûlünden zikrolunan tarlaların nısf-ı şâyi‘isin tefevvüz eyledikden sonra sipâhî olan hâzır bi’l-meclis mezbûr Süleyman Ağa bana tefvîz ben dahi tefevvüz ve kabûl edip ona binâen zabt u tasarruf ederim deyip sâhib-i [arz] olan mezbûr Süleyman Ağa’dan suâl olundukda mukaddemâ müdde‘î-i mezbûr Türkmen Mustafa’ya zikrolunan tarlaları tapu ile tefvîz eylediğini mu‘terif olduğundan mâ‘adâ mezbûr Mehmed temessük ibrâzına dahi kādir olmadığından gayrı zikrolunan tarlaların mecmû‘unu sâhib-i arz olan mezbûr Süleyman Ağa mukaddemâ müdde‘î-i mezbûra tapu ile tefvîz eylediğini mu‘terif olmağın mûcibiyle zikrolunan tarlaların nısf-ı şâyi‘inden kasr-ı yedine mezkûr Mehmed’e tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Çelebi el-kâtib, Osman Beşe çukadâr, İsa Bey b. Ahmed, el-Hâc Ca‘fer b. Abdullah ve gayruhüm mine’l-[hâzırîn.]