Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 214 Hüküm no: 170 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin oğlu Ali’yi dövüp yaralayan Miço v. Kondi’nin tedavi ücretini vererek sulh olduğu Mahmiye-i İstanbul’da Karabaş mahallesinde sâkin Ali nâm sagīrin babası ve velisi Mehmed b. Ali nâm kimesne meclis-i şer‘-i hatîr-i lâzimü’t-tevkīrde hâmilü hâze’l-kitâb Miço v. Kondi nâm zimmî muvâcehesinde bi’l-velâye ikrâr ve i‘tirâf edip mezbûr Miço târih-i kitâb gecesi oğlum sagīr-i mezbûru mahalle-i mezbûrede vâki‘ Solakzâde Bostanı demekle ma‘rûf bostanda bi-gayrı hakkın amden depme ile kasığına darb ve mecrûh etmekle mûcibi mezbûr Miço’dan velâyeten taleb ve da‘vâ ettiğimde ol dahi inkâr etmekle beynimizde münâza‘ât-ı kesîre vâkı‘a olmuşidi hâlâ mezbûr Miço oğlum merkūm Ali’ye mu‘âlece eylemek için ücret-i tabîb nâmında yedime dört yüz akçe def‘ ve teslîm ben dahi ahz u kabz edip da‘vâ-yı mezkûreden berî oldum min ba‘d mezbûr Miço ile da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Subaşı b. Mustafa, İsmail b. ( ) el-müezzin, Ramazan b. Yusuf, İbrahim b. Hasan ve gayruhüm mine’l-[hâzırîn.]