Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 217 Hüküm no: 173 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürt Hüseyin’in terekesi hususunda varislerinden amcası oğlu Zülfikar b. Mehmed’in merhumun karısı Ayşe’nin zimmetini ibra ettiği Havâss-ı aliyye kazâsına tâbi‘ Ayasağa nâm karye sâkinlerinden iken bundan akdem vefât eden Kürd Hüseyin b. Durmuş’un verâseti zevceteyn-i metrûketeyn Âişe bt. Hacı nâm hâtun ile Halime bt. Ali nâm hâtuna ve li-ebeveyn ammi oğlu Zülfikar b. Mehmed’e münhasıra olduğu şer‘an mütehakkık oldukdan sonra mezkûr Zülfikar meclis-i şer‘-i hatîr-i lâzimü’t-tevkīrde müteveffâ-yı mezkûrun zevcesi mezkûre Âişe Hâtun mahzarında tav‘an ikrâr ve i‘tirâf edip mûrisimiz müteveffâ-yı mezkûrun cemî‘ terekesinden bana isâbet eden hisse-i şer‘iyyem mukābilesinde mezbûre Âişe Hâtun tereke-i müteveffâ-yı mezbûra vâzı‘atü’l-yed olmağla bana bin râyic akçe def‘ ve teslîm edip ben dahi yedinden meblağ-ı mezkûr bin akçeyi tamâmen ahz u kabz eyledikden sonra müteveffâ-yı mezkûrun cemî‘ terekesinden bana isâbet eden hisse-i şer‘iyyem da‘vâsınan berî oldum min ba‘d mûrisim müteveffâ-yı mezkûrun cemî‘ terekesine müte‘allik mezkûre Âişe Hâtun üzerine da‘vâ ve nizâ‘ ve husûmet ve hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Durmuş Beşe b. Ebî Tâlib, Mustafa b. Musa, Hüseyin Çelebi b. Hâcı, Mestçi Ahmed b. İbrahim, Mustafa b. Emir, Osman Beşe çukadâr ve gayruhüm mine’l-[hâzırîn.]