Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 222 Hüküm no: 179 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Ağa b. Ali’nin merhum Kahire Kadısı Kâmilî Efendi’ye verdiği borç otuz beş guruşun varisleri tarafından terekesinden ödenmesi Mahmiye-i İstanbul’da Yarhisar mahallesinde sâkin işbu bâ‘isü’l-kitâb Receb Ağa b. Ali tarafından husûs-ı âti’z-zikre vekîl olup vekâleti Siyavuş Bey b. ( ) ve Yusuf Bey b. ( ) şehâdetleri ile şer‘an sâbite olan İbrahim Çelebi b. Ahmed mahfil-i kazâda bundan akdem Mısr-ı Kahire kādısı iken vefât eden merhûm Osmanzâde Mehmed Efendi’nin niyâbeti hizmetinde iken Mısır’da vefât eden Kâmilî Mehmed Efendi’nin verâseti zevce-i metrûkesi Sâime bt. Ömer nâm hâtun ile sulbî sagīr oğlu Ahmed’e münhasıra olduğu zâhir ve mütehakkık oldukdan sonra sagīr-i mezbûrun tesviye-i umûruna vasiyy-i muhtârı olan Mustafa Efendi b. Mehmed mahzarında üzerine bi’l-vekâle da‘vâ ve takrîr-i kelâm edip müvekkilim mezbûr Receb Ağa müteveffâ-yı mezbûr Kâmilî Mehmed Efendi’ye târih-i kitâbdan dokuz ay mukaddem iki yüz otuz beş kıt‘a riyâlî guruş ikrâz ve teslîm ol dahi yedinden iktirâz ve tesellüm ve yedine hat ve hatemini hâvî deyn temessükü dahi verdikden sonra kable’l-istîfâ mezbûr Kâmilî Mehmed Efendi vefât etmeğin hâlâ tereke-i vâfiyyesinden edâ etmek üzere vasiyy-i mezbûr Mustafa Efendi’den taleb ederim suâl olunup müvekkilim için teslîme vasiyy-i mezbûra tenbîh olunması matlûbumdur dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezbûre sükkânından Şa‘ban Efendi b. Halil el-imâm ve Ahmed Çelebi b. Abdullah nâm kimesneler li-ecli’l-şehâde meclis-i şer‘a hâzırân olup isre’l-istişhâdi’ş-şer‘î fi’l-hakīka târih-i mezbûrda müvekkil-i merkūm Receb Ağa müteveffâ-yı mezbûr Kâmilî Mehmed Efendi’ye hayâtında bizim huzûrumuzda meblağ-ı mezbûr iki yüz otuz beş kıta riyâlî guruşunu ikrâz ve teslîm ol dahi yedinden iktirâz ve tesellüm eyleyip müvekkil-i mezbûr Receb Ağa yedine hat ve hatemini hâvî işbu deyn temessüğünü vermişidi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde isre ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcibiyle müvekkil-i mezbûr Receb Ağa’ya meblağ-ı mezbûr iki yüz otuz beş riyâlî guruşunu hayâtında müteveffâ-yı mezbûrdan küllen veyâ bazen ahz u kabz veyâ hibe veyâ âhara havâle veya turuk-ı şer‘iyyeden bir tarîk ile zimmetini ibrâ etmediğine yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Osman Beşe b. Sevindik, İsmail Çelebi b. Yunus, Mehmed b. Haydar, İsa b. Ahmed ve gayruhüm mine’l-huzzâr.