Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 224 Hüküm no: 181 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sürücü Dimitri v. Yani’nin koyun bedelinden Kasap Kirkor v. Pomer ve ortağı Sefer’den on sekiz bin akçe alacağı olduğu Vilâyet-i Rumeli’nde Çatalca nâm karye ahâlîsinden olup sürücü tâifesinden Dimitri v. Yani nâm zimmî meclis-i şer‘-i hatîr-i lâzimü’t-tevkīrde mahmiye-i İstanbul’da kasab tâifesinden Kirkor v. Pomer nâm Ermeni zimmî muvacehesinde üzerine takrîr-i da‘vâ edip bundan akdem mezbûr Kirkor ile şerîki olup gāib ani’l-meclis Sefer nâm Ermeni beher re’si yüz kırk ikişer akçeye olmak üzere iki yüz on beş re’s koyunumu otuz bin beş yüz otuz beş akçeye bey‘ ve teslîm onlar dahi vech-i muharrer üzere iştirâ ve tesellüm eylediklerinden sonra semen-i mezkûrun beş bin beş yüz akçesini mezbûr Kirkor yedinden ve bin iki yüz akçesini bir def‘a ve bin altı yüz akçesini bir def‘a ve üç bin altı yüz akçesini bir def‘a cem‘an altı bin dört yüz akçesini şerîki mezbûr Sefer yedinden ahz u kabz eyledim mâ‘adâsı olan on sekiz bin akçe hakkım hâlâ zimmetindedir suâl olunup alıverilmesi matlûbumdur dedikde gıbbe’s-suâl mezbûr Kirkor cevâbında fi’l-vâki‘ müdde‘î-i mezbûr Dimitri’ye kendiden iştirâ ve kabz eylediğimiz iki yüz on beş re’s koyun semeninden otuz bin beş yüz otuz beş akçe deynimizin on iki bin beş yüz akçesini ben ve şerîkim mezbûr Sefer bi’d-defe‘ât kendiye edâ ve teslîm edip mâ‘adâsı olan on sekiz bin akçe hâlâ zimmetimizde lâzimü’l-edâ deynimizdir deyu bi-tav‘ihî ikrâr ve i‘tirâf edicek meblağ-ı bâkī-i mezkûr on sekiz bin akçeyi müdde-i mezbûr Dimitri’ye edâ ve teslîme mezbûr Kirkor üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Abdullah, Süleyman Bey b. Ali Bey, İsa Bey b. Ahmed ve gayruhüm mine’l-[hâzırîn.]