Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 227 Hüküm no: 184 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Mustafa’nın haksız yere kendisini hapsedip parasını aldığı iddiasıyla Mahmud Ağa aleyhine açtığı davada on guruşa sulh olduğu Fazîletlü efendi hazretlerinin imzâsıyladır. Livâ-i Canik’de Ökse kazâsına tâbi‘ Karabahçe nâm karye sükkânından Receb b. Mustafa nâm [kimesne] meclis-i şer‘-i hatîrde Dergâh-ı âlî kapıcıbaşılarından olup işbu kitâbın sâhibi iftihârü’l-emâcid ve’l-ekârim Mahmud Ağa b. Ahmed Paşa mahzarında tav‘an ikrâr ve i‘tirâf edip mezbûr Mahmud Ağa işbu [sene-i] mübârekede livâ-i Samsun’da kadırga yapdırmağa me’mûr oldukda bi-gayrı hakkın beni habs edip otuz kıt‘a riyâlî guruşumu almağla hâkim-i muvakkı‘-ı [sadr-ı] kitâb tûbâ lehü ve hüsnü-meâb hazretleri meblağ-ı mezbûru mezkûr Mahmud Ağa’dan taleb ve da‘vâ, ol dahi inkâr etmeğin müdde‘âmı şühûd-ı udûlla isbât ve edâsına hükm-i şer‘î lâhık olmuşiken edâda te‘allül etmekle beynimizde münâza‘ât-ı kesîre cereyânından sonra vesâtat-ı muslihîn ile da‘vâ-yı mezbûremden mezbûr Mahmud Ağa benimle on kıt‘a riyâlî kebîr guruş üzerine inşâ-i akd-i sulh eyledikde ben dahi [27a] sulh-ı mezburu kabûl ve bedel-i sulh olan meblağ-ı mezbûr on riyâlî guruşu meclis-i şer‘de mezkûr Mahmud Ağa yedinden tamâmen ahz u kabz ve mâ‘adâdan zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb [olundu.] Fi’l-yevmi’s-sâmin ve’l-ışrîn min-Şa‘bâni’l-mu‘azzam li-sene seb‘a ve sittîn ve elf. Şühûdü’l-hâl: es-Sâbıkūn.