Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 228 Hüküm no: 185 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Yorgi’nin Kuyumcu Palologa v. Şezari’den üç yüz guruş alacağı olduğu Fi’l-asl Cezîre-i Midilli’de kasaba-i Molova kasabası ahâlîsinden olup hâlâ mahmiye-i İstanbul’da Ayasofya-i kebîr sûkunda kuyumcu tâifesinden Kostantin v. Yorgi nâm zimmî meclis-i şer‘-i hatîr-i lâzimü’t-tevkīrde medîne-i Galata’da Sultân Bayezid mahallesi ahâlîsinden olup kuyumcu tâifesinden işbu râfi‘ü’l-kitâb Palologa v. Şezari nâm zimmî muvâcehesinde tav‘an ikrâr ve i‘tirâf edip mezbûr Palologa’ya cihet-i karz-ı şer‘îden iki yüz doksan riyâlî guruş ve semeni târih-i kitâbdan yüz yirmi gün tamâmına değin müeccel yedimden müşterâ ve makbûz levni ve zirâ‘ı beynimizde ilm-i şer‘î ile ma‘lûm çuka bahâsından dahi on guruş ki cem‘an üç yüz riyâlî guruş zimmetinde lâzimü’l-edâ ve vâcibü’l-kazâ deynim vardır dedikde gıbbe’t-tasdîkı’ş-şer‘î tâife-i mezbûreden olup işbu hâzırân bi’l-meclis olan Manolaki v. Kostantin ve Yanaki v. Mihalaki nâm zimmîler medyûn-ı mezbûr Kostantin’in nefsine ve gaybet ederse meblağ-ı mezbûr üç yüz guruşa ale’s-seviyye emr ve kabûlü hâviye kefâlet-i sahîha ile kefîl olduk dediklerinde mâ-hüve’l-vâki‘ bi’t-taleb ketb [ve] tahrîr [olundu.] Fi’l-yevmi’t-tâsi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, Osman Beşe çukadâr ve gayruhüm mine’l-[hâzırîn.]