Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 228 Hüküm no: 186 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Molla Gürani mahallesindeki menzilinin varisleri tarafından Ali Ağa’ya satıldığı Mahmiye-i İstanbul’da Molla Gürânî mahallesinde sâkine olup bundan akdem vefât eden Âişe bt. ( ) nâm hâtunun zâhirde verâseti ancak zevc-i metrûkü Ahmed Ağa b. Abdülmennân’a münhasıra olduğu şer‘an mütehakkık olmağla terekesinin nısfı zevci merkūm Ahmed Ağa’ya ve nısf-ı âharı cânib-i beytü’l-mâle âid olmağın zevci merkūm Ahmed Ağa’nın zevce-i menkûhası olup vekâlet-i âmme-i mutlaka ile tarafından vekîli ve âharı tevkîle me’zûne olduğu hüccet-i şer‘iyye ile sâbit olan Fâtıma bt. İbrahim Subaşı nâm hâtun kıbelinden bey‘-i âti’l-beyânı ikrâra vekîl olup vekâleti mahalle-i mezbûre sükkânından olmalarıyla merkūme Fâtıma Hâtun’u ma‘rifet-i şer‘iyye ile ârifeyn olan Ali Efendi b. Mehmed ve Dilaver Bey b. Abdullah şehâdetleriyle şer‘an sâbit olan Kenan Bey b. Abdülmennân nâm cündi vekâleten ve mahmiye-i mezbûrede vâki‘ beytü’l-mâl-ı âmme ve hâssa emîni olan mefharü’l-a‘yân es-Seyyid Mehmed Ağa b. es-Seyyid Nasrullah emâneten meclis-i şer‘-i hatîr-i lâzimü’t-tevkīrde Dergâh-ı âlî müteferrikalarından olan bâ‘isü hâze’l-kitâb mefharü’l-emâsil Ali Ağa b. el-merhûm eş-Şeyh İbrahim Efendi mahzarında herbiri tav‘an ikrâr ve i‘tirâf edip müteveffât-ı merkūme Âişe’nin ile’l-vefât mülkü olup ba‘de vefâtihâ terekesinden olmağla nısf-ı şâyi‘i zevci merkūm Ahmed Ağa’ya ve nısf-ı şâyi‘-i âharı dahi cânib-i beytü’l-mâle âid olup mahalle-i mezbûrede vâki‘ bir tarafdan Sarı Solak mülküne ve bir tarafdan sipâhîler çavuşu olan Mustafa Çavuş mülküne ve bir tarafdan merhûm Bayram Paşa Vakfı olan odalara ve bir tarafdan tarîk-ı âmma müntehî olup muhavvata-i dâhiliyyesi üç bâb fevkānî ve iki bâb tahtânî odaları ve iki sofayı ve bir matbahı ve câmekânı ile hamamı ve bir kârgîr mahzeni ve bir su kuyusu ve kenîfi ve zât-ı eşcâr-ı müsmire ve gayr-ı müsmire hadîkayı ve muhavvata-i hâriciyyesi üç bâb fevkānî odaları ve iki sofayı ve bir mâbeyn odası ve bir kahve odası ve dört bâb tahtânî odaları ve bir ahırı ve bir arpa anbarını ve bir su kuyusunu ve iki kenîfi müştemil olan cemî‘ mülk menzili müvekkile-i merkūme Fâtıma Hâtun ve emîn-i merkūm Mehmed Ağa sûk-ı sultânîde müzâyede ve bey‘a arz eylediklerinde ba‘de’l-müzâyede rağabât-ı nâs münkatı‘a olup iki bin altı yüz riyâlî guruşda merkūm Ali Ağa üzerinde karâr edip ziyâde ile tâlib-i âhar kalmayıp ve meblağ-ı mezbûr menzil-i mezbûrun semen-i misli iken mezbûr Ali Ağa cânib-i beytü’l-mâle nef‘an ba‘de’l-müzâyede ve inkıtâ‘u’r-rağbe üzerinde karâr eden iki bin altı yüz riyâlî guruş üzerine iki yüz riyâlî guruş dahi ziyâde edip cümle semen-i menzil iki bin sekiz yüz riyâlî guruş olmağla cânib-i beytü’l-mâle nef‘ hâsıl olup vech-i meşrûh üzere menzil-i mezbûrun bey‘i cânib-i beytü’l-mâle nâfi‘ olmağın müvekkilem merkūme Fâtıma Hâtun vekâleten ve emîn-i merkūm emâneten cemî‘ menzil-i mezbûru kâffe-i hukūk ve merâfıkı ile merkūm Ali’ye meblağ-ı merkūm iki bin sekiz yüz riyâlî guruşa tarafeynden îcâb ve kabûlü hâvî bey‘-i bâtla bey‘ ve teslîm edip merkūm Ali Ağa dahi nefsi’çün iştirâ ve kabûl ve tesellüm ettikden sonra semen-i merkūm iki bin sekiz yüz guruşun bin dört yüz guruşunu müvekkilem merkūme Fâtıma Hâtun’a ve bin dört yüz guruşunu emîn-i merkūm Mehmed Ağa’ya def‘ ve teslîm edip mezbûrân ahz u kabz edip cemî‘ menzil-i mezbûr merkūm Ali Ağa’nın mülk-i müşterâsıdır keyfe mâ yeşâ ve yahtâr mutasarrıf olsun dediklerinde ggıbbe’t-tesâdukı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mefharü’l-emâsil İsmail b. Fâik, es-Seyyid Süleyman Çelebi b. es-Seyyid Mehmed, Mefharü’l-kuzât Ahmed Efendi b. Yahya Efendi, Ali Çavuş b. Abdullah, Mustafa Çelebi b. Hüseyin, Mehmed Çelebi b. Salih, Ali Bey b. Abdullah.