Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 230 Hüküm no: 187 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin Bihlişte kazasındaki mülk menzilini ve bağını Ali b. Kurd’a iki bin beş yüz akçeye sattığı Hâssa tavukçularından Mustafa b. Ali nâm kimesne meclis-i şer‘-i hatîr-i lâzimü’t-tevkīrde işbu bâ‘isü’l-vesîka Ali b. Kurd mahzarında ikrâr ve takrîr-i kelâm edip silk-i mülkümde münselik olup Vilâyet-i Rumeli’nden Bihlişte kazâsına tâbi‘ Podgorya nâm karyede vâki‘ bir tarafı Kurd Beşe mülküne ve bir tarafdan Aydın Beşe nâm kimesne mülküne ve bir tarafdan Mehmed Beşe mülküne ve bir tarafdan tarîk-ı âmma müntehî bir fevkānî oda ve bir kileri ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık ve yine karye-i mezbûre sınırı dâhilinde vâki‘ bir tarafı İlyas Beşe bağına ve bir tarafı Hüseyin Beşe bağına ve bir tarafı Kasım bağına ve bir tarafı Mehmed Beşe nâm kimesne bağına müntehî on çapalık bir kıt‘a mülk bağımı bi-cümleti’t-tevâbi‘ tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ali’ye iki bin beş yüz akçeye bey‘ ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr iki bin beş yüz akçeyi tamâmen mezbûr Ali yedinden ahz u kabz edip emlâk-i mezbûreyi mahallinde kabz ve tasarrufa müşterî-i mezbûr Ali’ye taslît eyledim zikri mürûr eden menzil ve bağ merkūm Ali’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali b. Mehmed, Mehmed b. Hasan, İbrahim Bey b. Ömer, Hüseyin b. ( ) çorbacı, Oruc Beşe b. Sefer, Mehmed b. Durmuş, Kasım b. Hasan ve gayruhüm mine’l-[hâzırîn.]