Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 230 Hüküm no: 188 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Avraham v. Hayim’in aldığı borçla birlikte çuka bedelinden Yahuda v. Mordehay’a iki bin guruş borcu olduğunu ikrar ettiği Mahmiye-i İstanbul’da Portakal cemâ‘atinden Avraham v. Hayim nâm Yahudi meclis-i şer‘-i hatîrde mahmiye-i mezbûrede Balıkbâzârı’nda sâkin olup Katalan cemâ‘atından işbu bâ‘isü’s-sifr Yahuda v. Mordehay nâm Yahudi tarafından husûs-ı âti’z-zikri tasdîka vekîl olup Katalan cemâ‘atinden Avraham v. Mosi ve Portakal cemâ‘atinden Yakud v. Avraham nâm Yahudiler şehâdetleri ile vekâleti sâbite olan Haskiya v. Paşo nâm Yahudi mahzarında bi’t-tav‘i’s-sâf ikrâr ve i‘tirâf edip müvekkil-i mezbûr Yahuda yedinden müşterâ ve makbûz yüz zirâ‘ mâ’î Londra çuka ve yüz elli zirâ‘ laciverdî Londra çuka semenlerinden târih-i kitâbdan bir sene tamâmına değin müeccel ve mev‘ûd zimmetimde müvekkil-i mezbûr Yahuda’ya bin beş yüz esedî guruş ve cihet-i karz-ı şer‘îden dahi beş yüz esedî guruş ki cem‘an [iki] bin esedî guruş lâzımü’l-edâ ve vâcibü’l-kazâ deynim vardır dedikde mukırr-ı mezbûru vech-i meşrûh üzere sudûr eden kelimâtında vekîl-i mezkûr Haskiya bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Muharrem, Salih Efendi b. Salih, Ahmed Çelebi b. Abdülkerim, Osman Beşe çukadâr, İsa Bey b. Ahmed, Mehmed Çelebi b. Haydar, el-Hâc Ca‘fer b. Abdullah ve gayruhüm mine’l-[hâzırîn.]