Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 231 Hüküm no: 189 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed’in kavga ettiği Ahmed b. Hüseyin’i yaraladığını ikrar ettiği Budur ki mahmiye-i İstanbul’da Üskübî mahallesi sâkinlerinden Ahmed b. Hüseyin nâm kimesne meclis-i şer‘-i hatîr-i lâzimü’t-tevkīrde damadı olup Dergâh-ı âlî mahfûfen bi’l-me‘âlî yeniçerilerinin otuzuncu ağa bölüğüne mahsûs oda ahâlîsinden Ali Beşe b. Mehmed mahzarında üzerine takrîr-i da‘vâ edip mezbûr Ali Beşe târih-i kitâb günü tüfenk kundağı ve yumruk ile elime darb edip beni mecrûh eyledi suâl olunup mûcib-i şer‘îsi icrâ olunması matlûbumdur dedikde gıbbe’s-suâl mezbûr Ali Beşe cevâbında fi’l-hakīka müdde‘î-i mezbûr Ahmed ile sâkin olduğumuz kendi menzilimizde gavga esnâsında yumruk ile mezbûr Ahmed’in eline darb edip mecrûh eyledim deyu tâyi‘an i‘tirâfı bi’t-taleb ketb olundu. Fi’l-yevmi’l-hâdî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi b. Mehmed el-hatîb, İbrahim Efendi b. Halil, Osman Beşe b. Mehmed, Ahmed Beşe b. Mehmed, Ömer Beşe b. Mustafa.