Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 231 Hüküm no: 190 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kesari’nin açtığı alacak davasında davalı Niko v. Malato’nun alacağı olmadığına yemin ettiği Vilâyet-i Rumeli’nden Avlonya kazâsına tâbi‘ Ziveri nâm karye sâkinlerinden Yani v. Kesari nâm zimmî meclis-i şer‘-i hatîr-i lâzimü’t-tevkīrde işbu bâ‘isü’s-sifr Niko v. Malato nâm zimmî muvâcehesinde üzerine da‘vâ ve takrîr-i kelâm edip târih-i kitâbdan üç sene mukaddem mezbûr Niko’ya malımdan iki bin akçe ikrâz ve teslîm ol dahi yedimden iktirâz ve kabz eylediğinden mâ‘adâ yanında bir ay hizmet etmek için ücret ile mezbûra nefsimi îcâr ol dahi ba‘de’l-istîcâr yanında bir ay hizmet etmekle ciheteyn-i mezbûreteynden zimmetinde cem‘ an iki bin beş yüz akçe hakkım vardır hâlâ meblağ-ı mezbûrun merkūm Niko’dan suâl olup alıverilmesi matlûbumdur dedikde gıbbe’s-suâl ve akībe’l-inkâr merkūm Yani’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mezbûr Yani yedinden iki bin akçe iktirâz ve kabz ve ayda beş yüz akçe ücret ile müdde‘î-i mezbûru istîcâr etmeyip bu vechile üzerinde müdde‘î-i mezbûrun hakkı olmadığına merkūm Niko’ya yemîn teklîf olundukda ol dahi bi-hasebi’l-mes’ûl yemîn billâhi’l-lezî enzele’l-İncîle alâ İsa aleyhisselâm etmeğin mûcibiyle mu‘ârazadan men‘ olunup mâ-vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ramazan Çavuş b. Hasan el-mübâşir, Seydi b. Durmuş, Hâcı Bâli, Hüseyin b. Ali, Mehmed Ağa b. Hüseyin, Hüseyin Çelebi b. Hasan, Hüseyin Ağa b. Abdullah, Mustafa Çelebi b. Bâli ve gayruhüm mine’l-[hâzırîn.]