Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 232 Hüküm no: 191 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed’in Kilitçi Safer v. Mikal’den alacağı olduğuna dair açtığı davada iddiasını ispat edemediği Mahmiye-i İstanbul’da Uzun Çarşı kurbünde İbrahim Paşa mahallesi sükkânından el-Hâc Mehmed b. ( ) meclis-i şer‘-i hatîr-i lâzimü’t-tevkīrde kilidci tâifesinden hâmilü hâze’l-kitâb Safer v. Mikal nâm zimmî muvâcehesinde üzerine da‘vâ ve takrîr-i kelâm edip merkūm Safer’e fâidesi beynimizde nısf olmak üzere malımdan ve yedimden on sekiz bin râyic [fi’l]-vakt akçe def‘ ve teslîm edip merkūm Safer dahi ba‘de’l-kabz altı sene i‘mâl ve sinîn-i merkūmeden hâsıl olan fâidenin nısfı bana teslîm ettiğinden mâ‘adâ asl-ı mâl-ı merkūmdan dahi on üç bin akçeyi bana def‘ ve teslîm edip meblağ-ı bâkī beş bin akçem yedinde kalmışdır hâlâ taleb ederim [suâl] olunsun dedikde gıbbe’s-suâl merkūm Safer cevâbında fi’l-hakīka minvâl-i muharrer üzere meblağ-ı mezbûru merkūm el-Hâc Mehmed’den ahz u kabz edip sinîn-i merkūmede i‘mâl ve hâsıl olan fâidenin nısfı kendiye teslîmimden mâ‘adâ asl-ı mâl-ı merkūmu dahi tamâmen kendiye teslîm etmişken merkūm el-Hâc Mehmed meblağ-ı mezbûru vech-i muharrer üzere kabzını inkâr ile beynimizde nizâ‘-ı küllî vukū‘undan sonra muslihûn tavassut edip merkūm el-Hâc Mehmed ile beni bin râyic [fi’l]-vakt akçe üzerine sulh ve ben dahi kabûl edip bedel-i sulh olan meblağ-ı mezbûru merkūm el-Hâc Mehmed’e def‘ ve teslîm edip ol dahi ahz u kabz ve husûs-ı mezbûra müte‘allika âmme-i de‘âvîden zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi deyu def‘le mukābile edicek gıbbe’l-istintâk ve’l-inkâr merkūm Safer’den def‘-i meşrûhunu mübeyyine beyyine taleb olundukda udûl-i Müslimînden olup mahmiye-i mezbûrede Molla Hüsrev mahallesinde sâkin es-Seyyid Receb Çelebi b. es-Seyyid Pîrî ve Çukur mahallesinde sâkin Ömer Beşe b. el-Hâc Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm el-Hâc Mehmed ile merkūm Safer beynlerinde meblağ-ı mezbûra müte‘allika nizâ‘ vâki‘ oldukda beynlerine muslihûn tavassut edip husûs-ı mezbûrdan merkūm el-Hâc Mehmed ile mezbûr Safer’i meblağ-ı mezbûr bin akçe üzerine sulh eylediklerinde mezbûr el-Hâc Mehmed dahi sulh-ı mezbûru kabûl ve bedel-i mezbûru yedinden kabz edip husûs-ı mezbûra müte‘allika da‘vâdan merkūm el-Hâc Mehmed mezbûr Safer’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcib iyle müdde‘î-i mezbûr el-Hâc Mehmed bî-vech mu‘ârazadan men‘ olunup mâ-vaka‘a bi’t-taleb ketb olundu. Tahrîren fi’l-yevmi’l-âşir min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi b. Salih, Mustafa Efendi b. Muharrem, Mehmed Efendi b. Veli Efendi, Ahmed Efendi b. Mehmed Efendi, İsa Bey b. Mehmed, İsa Bey b. Ahmed, el-Hâc Ca‘fer b. Abdullah, Osman Beşe çukadâr ve gayruhüm mine’l-[hâzırîn.]