Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 235 Hüküm no: 193 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bele bt. Mesanel’in vakıf bakkal dükkanının tasarrufu hususunda amcası İsak v. Mordehay ile olan anlaşmazlığında dört bin akçe üzerine sulh olduğu Mahmiye-i İstanbul’da Spinoza cemâ‘atinden olan Bele bt. Mesanel nâm Yahudiyye meclis-i şer‘-i hatîr-i lâzimü’t-tevkīrde li-ebeveyn ammisi olup hâlâ Kudüs-i şerîf’de tavattun eden sâhibü hâze’l-kitâb İsak v. Mordehay nâm Yahudi mahzarında tav‘an [ikrâr] ve i‘tirâf edip mahmiye-i mezbûrede Sarıdemirci mahallesinde vâki‘ olup merhûm Çaşnigir Vakfı’na beher mâh doksan akçe icâre-i müeccelesi olan bir bâb bakkal dükkânı bundan akdem ma‘rifet-i mütevellî-i vakf-ı mezbûr ile icâre-i mu‘accele-i ma‘lûme ve icâre-i müeccele-i mezkûre ile mezbûr İsak’ın babası ve benim ceddim olan mezkûr Mordehay’ın taht-ı yedinde ve tasarrufunda olup hâlik oldukda dükkân-ı mezbûrun tasarrufu intikāl-i âdî ile oğulları mezbûr İsak mezbûr Mesanel ile kızları Kalomira ve Yasefet’e intikāl edip ba‘dehû babam merkūm Mesanel dahi hâlik olup dükkân-ı mezbûrdan rub‘-ı şâyi‘ hissesi bana intikāl etmişiken merkūm İsak cemî‘ dükkân-ı mezbûru zabt edip baban merkūm Mesanel ceddin olup benim babam olan merkūm Mordehay’dan mukaddem hâlik olmuşdur deyu dükkân-ı mezbûrun rub‘-ı şâyi‘ini tasarrufuma mâni‘ olmağla beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimizde muslihûn tavassut edip ammi-i merkūm İsak ile beni mârrü’z-zikr vakıf bakkal dükkânının rub‘-ı şâyi‘i da‘vâsından dört bin râyic fi’l-vakt üzerine sulh eylediklerinde ben dahi sulh-ı mezbûru kabûl ve bedel-i sulh olan dört bin akçeyi meclis-i sulhda ammim merkūm İsak yedinden ahz u kabz edip zikrolunan vakıf bakkal dükkânının rub‘-ı şâyi‘i da‘vâsından berî olup ammim mezbûrun zimmetini dahi da‘vâ-yı mezkûreden ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūm İsak üzerine zikrolunan vakıf bakkal dükkânının rub‘-ı şâyi‘ine müte‘allika ve târih-i kitâba gelince beynimizde vukū‘ bulan hukūk-ı ma‘lûmeye müte‘allika bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Şevvâli’l-mükerrem li-sene 1067. Şühûdü’l-hâl: Salih Efendi b. Salih el-kādî, Mehmed Efendi b. Veli Efendi, Mehmed Beşe b. Abdüllatif, Kenan b. Abdullah, İbrahim Beşe b. Hasan ve gayruhüm mine’l-[hâzırîn.]