Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 239 Hüküm no: 196 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Abdülmennan’ın Mustafa Reis b. Abdullah’tan sulh bedeli olarak yirmi bin akçe alacağı olduğu Mahmiye-i Galata hâricinde vâki‘ Tophane kasabası mahallâtından İlyas Çelebi mahallesi a‘yânından sâhibü hâze’l-kitâb el-Hâc Mehmed Ağa b. Abdülmennân meclis-i şer‘-i hatîr-i lâzimü’t-tevkīrde sefîne reislerinden Mustafa Reis b. Abdullah mahzarında üzerine takrîr-i da‘vâ edip mezbûr Mustafa Reis zimmetinde cihet-i deyn-i şer‘îden otuz iki bin dokuz yüz râyic [fi’l]-vakt akçe hakkım olup taleb ettiğimde merkūm Mustafa Reis edâsında te‘allül etmekle beynimizde münâza‘ât-ı kesîre vukū‘undan sonra muslihûn tavassut edip merkūm Mustafa Reis ile beni meblağ-ı mezbûr otuz iki bin dokuz yüz akçe hakkım da‘vâsından an-ikrâr beni yirmi bin râyic [fi’l]-vakt akçe üzerine sulh eylediklerinde ben dahi sulh-ı mezbûru kabûl edip ve merkūm Mustafa Reis dahi bedel-i sulh-ı mezbûru bana teslîme ta‘ahhüd etmişiken yine bedel-i merkūmu edâ ve teslîmden ta‘annüt etmeğin târih-i kitâb senesi Şa‘bânü’l-mu‘azzamı’nın altıncı günü mahmiye-i Galata’da Bâb nâibi olan Çavuşzâde Mevlânâ Mustafa Efendi b. Mustafa huzûrunda murâfa‘a-i şer‘ olup bedel-i sulh-ı mezbûr yirmi bin akçeyi merkūm Mustafa Reis’den taleb ve da‘vâ ettiğimde merkūm Mustafa Reis sulh-ı mezbûru inkâr edip ben dahi şühûd-ı udûl ile muvâcehesinde isbât eylediğimde mevlânâ-yı mûmâ-ileyh şühûdumu istimâ‘ ve sıhhat-i sulh-ı mezbûra hüküm ve bedel-i sulh olan meblağ-ı merkūm yirmi bin akçeyi bana edâya merkūm Mustafa Reis’e tenbîh etmişiken merkūm Mustafa Reis ta‘annüt edip bedel-i sulh olan meblağ-ı mezbûru bana teslîmden imtinâ‘ eder suâl olunup bedel-i mezbûrun merkūm Mustafa Reis’den alıverilmesini taleb ederim deyu târih-i mezbûr ile müverraha ve mevlânâ-yı mûmâ-ileyhin imzâsıyla mümzât ve hatemi ile mahtûme ve mevlânâ-yı mezbûrun bedel-i sulh-ı mezbûru hükmünü hâvî hüccet-i şer‘iyye ibrâz edip merkūm Mustafa Reis muvâcehesinde feth u kırâat ve istintâk olundukda mezbûr Mustafa Reis cevâbında mazmûn-ı hüccet-i merkūmeyi tav‘an i‘tirâf eyledikde i‘tirâfı mûcebince bedel-i sulh-ı merkūm yirmi bin akçeyi müdde‘î-i merkūm Mehmed Ağa’ya edâ ile merkūm Mustafa Reis muvâcehesinde üzerine ilzâm-ı sahîh-i şer‘î kılınıp mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Bey b. Ca‘fer, Rıdvan Beşe b. Abdullah, Mahmud Beşe b. Osman, İsa Bey b. Ahmed, el-Hâc Ca‘fer b. Abdullah, Mehmed Çelebi b. Haydar, Osman Beşe çukadâr ve gayruhüm mine’l-[hâzırîn.]