Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 240 Hüküm no: 197 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah Beşe b. Mahmud’un kitap ve parasını çaldığı iddiasıyla Mehmed Beşe b. Haydar aleyhine açtığı davada iddiasını ispat edemediği Mahmiye-i İstanbul’da Dergâh-ı âlî dâme mahfûfen bi’l-me‘âlî yeniçerilerinin on sekizinci ağa bölüğüne mahsûs odanın hâlâ odabaşısı olan Lütfullah Beşe b. Mahmud meclis-i şer‘-i hatîr-i lâzimü’t-tevkīrde oda-i mezkûre ahâlîsinden işbu sâhibü’l-kitâb Mehmed Beşe b. Haydar mahzarında üzerine takrîr-i da‘vâ edip mezbûr Mehmed Beşe târih-i kitâbdan beş gün mukaddem sâkin olduğum odanın kilidini fethe edip bir beyâz kîse içinde mahfûz yedi bin akçem ile üç yüz akçe kıymetli bir en‘âm-ı şerîfim ahz eylemişdir suâl olunup meblağ-ı [mezbûr] yedi bin akçemi ve en‘âm-ı şerîfimin aynı mevcûd ise aynını ve illâ yevm-i ahzında kıymetini mezbûrdan alıverilmesin taleb ederim suâl olunsun dedikde gıbbe’s-suâl mezbûr Mehmed Beşe cevâbında husûs-ı mezbûru bi’l-külliyye inkâr edicek müdde‘î-i mezbûr Lütfullah Çelebi’den da‘vâsına mutabıka beyyine taleb olundukda ityân-ı beyyineden izhâr-ı acz ile istihlâf etmeğin merkūm Mehmed Beşe’ye müdde‘î-i merkūm Lütfullah Beşe’nin vech-i meşrûh üzere odasının kilidini feth edip meblağ-ı mezbûr yedi bin akçesini ve en‘âm-ı şerîfini ahz etmediğine ve müdde‘î-i mezkûr Lütfullah Beşe’nin bu vechile üzerinde hakkı olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin müdde‘î-i merkūm Lütfullah Beşe mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâdî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Bey b. Mehmed el-cündi, Abdullah Beşe b. Hüseyin er-râcil, Mustafa Çelebi b. Abdurrahman, Salih Mehmed Çelebi el-mukayyid, Osman Beşe çukadâr ve gayruhüm mine’l-[hâzırîn.]