Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 241 Hüküm no: 198 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anestos v. Tetoki’nin Çukur mahallesindeki mülk evini otuz bin akçeye Mehmed Çelebi b. Ali’ye sattığı Vilâyet-i Rumeli’nde Mora sancağında Ayopetro kazâsına tâbi‘ Ayoya nâm karye sâkinlerinden Anestos v. Tetoki nâm zimmî tarafından husûs-ı âti’z-zikre vekîl olup vekâleti Yani v. Panayot ve Yorgi [v.] Panayot nâm zimmîler şehâdetleri ile şer‘an sâbit olan Mihal v. Nikola nâm zimmî meclis-i şer‘-i hatîr-i lâzimü’t-tevkīrde işbu bâ‘isü’r-rakīm zahrü’l-eşbâh Mehmed Çelebi b. Ali mahzarında bi’l-vekâle ikrâr ve takrîr-i kelâm edip müvekkil-i mezbûr Anestos’un silk-i mülkünde olup mahmiye-i İstanbul’da Yenikapı kurbünde Çukur mahallesinde vâki‘ bir tarafı Yanaki v. Yorgaki nâm zimmî mülküne ve bir tarafı Kostantin v. Dimitri mülküne ve bir tarafı sâhil-i bahre ve bir tarafı cidâr-ı hısn ve bazen tarîk-ı âmma müntehî üç bâb tahtânî odaları ve bir kenîfi müştemil mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz iki bin akçeye vekâletim hasebiyle mezbûr Mehmed Çelebi’ye bey‘ ve teslîm ol dahi vech-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr otuz iki bin akçenin on sekiz bin akçesini müvekkil-i mezbûrun cihet-i deyn-i şer‘îden zimmetinde müşterî-i mezbûr Mehmed Çelebi’ye deyni olan on sekiz bin akçeye takās edip ol dahi minvâl-i muharrer üzere mukāssa ve kabûl edip semen-i bâkī on dört bin akçeyi dahi tamâmen mezbûr Mehmed Çelebi yedinden vekâletim hasebiyle ahz u kabz eyledim ba‘de’l-yevm menzil-i mahdûd-ı mezbûr merkūm Mehmed Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Derviş Efendi b. el-Hâc Mustafa, el-Hâc Ahmed b. el-Hâc Mustafa, Rıdvan Bey b. Abdullah el-cündi, Hasan b. Abdullah, Siyami b. Hayatî, Mustafa Çelebi b. İskender, el-Hâc Yunus b. Nuh, el-Hâc Ömer b. Ali, Yusuf Çelebi b. Abdullah.