Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 242 Hüküm no: 200 Orijinal metin no: [29a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Bey b. Ömer’in Arpa Emini mahallesindeki evini yüz altmış guruşa karısı Rabia Hatun bt. Abdullah’a sattığı Mahmiye-i İstanbul’da Yenibahçe kurbünde Arpa Emini mahallesi sâkinlerinden Osman Bey b. Ömer tarafından ikrâr-ı âti’l-beyâna vekîl olup Ali Beşe b. Mehmed ve Receb Beşe b. Durmuş nâm kimesneler şehâdetleri ile şer‘an vekâleti sâbite olan Ali Beşe b. Mustafa meclis-i şer‘-i şerîf-i lâzimü’t-teşrîfde merkūm Osman Bey’in zevce-i menkûhası bâ‘isetü’l-vesîka Râbia Hâtun bt. Abdullah tarafından ikrâr-ı âti’l-beyânı tasdîka vekîl olup mezbûrenin zâtını ma‘rifet-i şer‘iyye ile ârifân olan Hasan b. Mahmud ve Bayram Beşe [29b] b. Sadi şehâdetleri ile şer‘an vekâleti sâbite olan Üstâd Yusuf b. Mehmed mahzarında ikrâr ve i‘tirâf edip müvekkilim mezbûr Osman Bey zikri âtî akdin sudûruna değin silk-i mülk-i sahîhinde münselik olup mahalle-i mezbûrede vâki‘ bir tarafı Osman Ağa b. Gazanfer odaları ve iki tarafı mezbûr Osman Ağa bahçesi ve bir tarafı tarîk-ı âm ile mahdûd ve mümtâz iki bâb fevkānî oda ve bir bâb tahtânî oda ve havlu ve ( ) zirâ‘ arsa-i hâliye ve kenîfi müştemil baş ta‘bîr olunur mülk menzilini cemî‘ tevâbi‘ ve levâhıkı ve kâffe-i menâfi‘ ve merâfıkı ile merkūm Üstâd Yusuf’un müvekkilesi mersûme Râbia Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz altmış riyâlî kebîr guruşa bey‘ ve teslîm ol dahi iştirâ ve tesellüm ve kabûl ve kabz eylediğinen sonra semeni olan meblağ-ı mezbûr yüz altmış guruşu tamâmen yedinden ahz u kabz edip min ba‘d menzil-i mahdûd-ı mezkûrda ve semeninde hak ve alâkam kalmadı ve keyfemâ teşâ ve tahtâr mutasarrıfe olsun dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mefharü’l-eimme Hasan Efendi b. Mahmud, Mehmed Bey b. Ömer el-cündi, Ali Halîfe b. ( ) el-müezzin, Ahmed Çelebi b. Osman, Mehmed b. Mustafa, Osman Bey b. Abdullah el-cündi, Osman Beşe çukadâr ve gayruhüm mine’l-[hâzırîn.]