Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 243 Hüküm no: 201 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef’in oğulları Bedros ve Melkon’un kendilerini dövüp bıçaklayan yaralayarak paralarını gaspettikleri iddiasıyla Bayezid Ağa mahallesindeki bazı Ermeniler aleyhine açtıkları davada sulh oldukları Mahmiye-i İstanbul’da Sulumanastır’da Abdi Çelebi mahallesi sükkânından Bedros ve Melkon veledey Yasef nâm Ermeniler meclis-i şer‘-i hatîrde mahmiye-i mezbûrede Bayezid Ağa mahallesi sükkânından Minas v. Markos ve Asman v. Bila ve Kirkor v. Vartan ve Maraloski Ağa v. Mardros ve Parnak v. Simovon nâm Ermeniler taraflarından sulh-ı âti’l-beyâna vekîl olup vekâleti mezkûr Bayezid mahallesi sükkânından Danik v. Mıgırdiç ve Kirkor v. Partor nâm Ermeniler şehâdetleri ile şer‘an vekâleti sâbite olan Derzi Dador v. Karabet nâm Ermeni mahzarında herbiri tav‘an ikrâr ve i‘tirâf edip müvekkilûn-ı mezbûrûn işbu mâh-ı Şevvâl’in on birinci günü bâzâr ertesi gecesi ba‘de’l-mağrib zikrolunan Abdi Çelebi mahallesinde bizi darb-ı şedîd ile herbiri darb ettiklerinden mâ‘adâ benim sol elimin parmakları üzerine ve karındaşım işbu Melkon’un sol elinin bileği üzerine bıçak ile darb ve mecrûh ettiklerinden mâ‘adâ koynumdan üç bin râyic [fi’l]-vakt akçemi ahz etmeleriyle mezbûrlar üzerlerine meblağ-ı mezbûr üç bin akçemi ve herbirimiz cerhlerimizin mûcibini müvekkilûn-ı mezbûrûn üzerlerine da‘vâ ve taleb ettiğimizde mezbûrlar inkâr etmeleriyle beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassut edip mezbûrûnun taraflarından vekîlleri olan mezbûr Derzi Dador ile bizi an-inkâr meblağ-ı mezbûr ile cerhimizin mûcibi da‘vâsından üç bin râyic [fi’l]-vakt akçe ile on kıt‘a riyâlî guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûru vekîl-i merkūm Dador yedinden tamâmen ahz u kabz edip müvekkilûn-ı mezbûrûnun zimmetlerini meblağ-ı mezbûr da‘vâsından ve cerhlerimizin mûcibi da‘vâsından ve cerhlerimizin te’sîrinden hâlik olursak dem ve diyetimiz da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d müvekkilûn-ı mezbûrûndan bi-vechin mine’l-vücûh ve sebebin mine’l-esbâb da‘vâ ve hakkımız yokdur dediklerinde gıbbe’t-tasdîkı’ş-şer‘î yine mezkûr Abdi Çelebi mahallesi sükkânından Karabet v. Yani nâm Ermeni meclis-i şer‘-i mezbûrda vekîl-i merkūm Dador mahzarında tav‘an ikrâr ve i‘tirâf edip biz dahi vakt-i mezbûrda mezbûrların gavgasında işbu hâzır bi’l-meclis siyâh müsta‘mel çuka kürdiyyem ile alacak sarığım zâyi‘ olmağla mezbûrûn ahz eylediler taleb ve da‘vâ etmişidim el-hâletü hâzihî işbu çuka kürdiyyem ve sarığım ve bazı eşyâmı hîn-i nizâ‘da ismi ma‘lûmumuz değil bir kimesne ahz etmekle a‘yânı bana teslîm edip ben dahi tamâmen kabz eyledim min ba‘d benim dahi müvekkilûn-ı mezbûrûn üzerlerine bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Çelebi b. Ali, Ahmed Çelebi b. Yusuf el-cündi, İbrahim Beşe b. Osman, Süleyman Çavuş b. Abdullah, Osman Beşe çukadâr ve gayruhüm mine’l-[hâzırîn.]