Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 244 Hüküm no: 202 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Avraham v. Hayim’in gerek dört yüz elli guruş alacağıyla ilgili gerekse Safed kasabasındaki Yahudilerden yaptığı cizye tahsilatıyla ilgili olarak Portakal cemaatine mensup hahamların zimmetlerini ibra ettiği Mahmiye-i İstanbul’da Portakal cemâ‘atinden Avraham v. Hayim nâm Yahudi meclis-i şer‘-i hatîr-i lâzimü’t-tevkīrde yine cemâ‘at-i mezbûreden işbu râfi‘û’s-sifr Haham Marzilay ve Haham Baroh Marzilay ve Haham Pontay Glaneni ve Haham David ve Haham Hayim Ebolafi ve Haham Haba Salom ve Haham İsak Salom ve Haham Mordehay ve Haham Goryal İspiralne ve Haham Beltay Omano ve Haham Avraham Alces ve Haham İlyazer Matalon ve Haham İsak Mone nâm Yahudiler taraflarından ikrâr-ı âti’z-zikri tasdîka vekîl olup Avraham v. Mosi ve Yako v. Avraham nâm Yahudiler şehâdetleri ile şer‘an vekâleti sâbite olan Haskiya v. Maşo muvâcehesinde ikrâr ve takrîr-i kelâm edip müvekkilûn-ı mezbûrûn zimmetlerinde cihet-i deyn-i şer‘îden dört yüz riyâlî guruş hakkım olup hâlâ meblağ-ı mezbûr dört yüz riyâlî guruşu müvekkilûn-ı mezbûrûn yedlerinden tamâmen ahz u kabz eylediğimden gayrı müvekkilûn-ı mezbûrûn Vilâyet-i Anadolu’da Safed kasabasında olan Yahudilerin cizye ve bi’l-cümle üzerlerine edâsı lâzım gelen tekâlîflerini cem‘ ve tahsîle taraf-ı saltanat-ı aliyyeden me’mûr olmaları ile taraflarından zikrolunan Safed kasabasında olan Yahudilerin cizye ve sâir tekâliflerini cem‘ ve tahsîle beni tevkîl ben dahi ba‘de kabûli’l-vekâle varıp kasaba-i mezbûrede sâkin olan tâifesinden cem‘ ve tahsîl ve makbûzâtımı müvekkilûn-ı mezbûrûna irsâl etmekle müvekkilûn-ı mezbûrûn ile beynimizde nice ahz u i‘tâ ve mu‘âmelât-ı şettâ vâkı‘a olmuşidi el-hâletü hâzihî müvekkilûn-ı mezbûrûn zimmetlerinde gerek ikrâz eylediğim meblağ-ı mezbûr dört yüz guruşdan ve gerek beynimizde cereyân eden [ahz] ü i‘tâdan bir akçe ve bir habbe hakkım zuhûr etmeyip târih-i kitâba gelince müvekkilûn-ı mezbûrûn ile beynimizde vâki‘ olan mu‘âmelâta müte‘allika cemî‘ de‘âvî ve mutâlebâtdan müvekkilûn-ı mezbûrûnun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d müvekkilûn-ı mezbûrûn zimmetlerinde bir akçe ve bir habbe hakkım bâkī kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İsa Bey b. Ahmed, Ahmed Çelebi b. Abdülkerim, Mehmed Çelebi b. Haydar ve gayruhüm mine’l-[hâzırîn.]