Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 245 Hüküm no: 203 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Haçador v. Hüdaverdi’nin tasarrufunda bulunan evin borçlarını ödemek üzere Zaharya v. Kirkor’a satıldığının anlaşıldığı Fazîletlü efendi hazretlerinin imzâsıyladır. Mahmiye-i İstanbul’da Dülbendci Hüsam mahallesi sükkânından olup bundan akdem hâlik olan Haçador v. Hüdaverdi’nin verâseti zevce-i metrûkesi Sara bt. Kirkor nâm Ermeniye’ye ve sulbî kebîr oğulları Ariton ve Hüdaverdi’ye ve sulbiye kebîre kızları Gül ile Cevri’ye münhasıra olup tereke-i hâlik-i mezbûr kırk sekiz sehimden i‘tibâr olunup sihâm-ı merkūmeden altı sehmi zevcesi merkūme Sara’ya ve on dörder sehmi oğulları merkūmân Ariton ve Hüdaverdi’den herbirine ve yedişer sehmi kızları merkūmetân Gül ve Cevri’den herbirine isâbet ettiği şer‘an mütehakkık oldukdan sonra merkūmûn Sara ve Ariton ve Hudâverdi ve Gül ve Cevri’den herbiri meclis-i şer‘-i hatîr-i lâzimü’t-tevkīrde zikri âtî menzile mülkiyet üzere vâzı‘u’l-yed olduğu şer‘an mütehakkık olan sâhibü hâze’l-kitâb Zaharya v. Kirkor nâm Ermeni mahzarında üzerine herbiri takrîr-i da‘vâ edip mahalle-i mezbûrede vâki‘ bir tarafdan Kuyumcuoğulları demekle ma‘rûf Mehmed ve İbrahim ibney Halil mülklerine ve bir tarafdan [30a] Kudüs-i Şerîf Vakfı olan menzile ve bir tarafdan Serkiz v. Yagob nâm Ermeni mülküne ve bir tarafdan tarîk-ı âmma müntehî olup büyût-ı adîdeyi müştemil olan cemî‘ mülk menzil bundan akdem babamız ve mûrisimiz hâlik-i mezbûrun ile’l-helâk taht-ı yedinde ve tasarrufunda mülkü olup ba‘de helâkihî terekesinden olmağla vech-i meşrûh üzere irs-i şer‘î ile bize intikāl etmiş iken mülk-i mevrûsumuz ve hakkımız iken mezbûr Zaharya cemî‘ menzil-i mezbûra bi-gayrı hakkın vaz‘-ı yed eylemişdir suâl olunup menzil-i mezbûrdan yed-i âdiyesi izâle olunmasını taleb ederiz dediklerinde gıbbe’s-suâl mezbûr Zaharya cevâbında fi’l-hakīka cemî‘ menzil-i merkūm müdde‘iyyûn-ı mezbûrûnun babaları ve mûrisleri hâli-i merkūm Haçador’un ile’l-helâk mülkü olup lâkin mezbûr Haçador’un düyûn-ı kesîre-i müsbetesi olup ve düyûnuna vefâ eder tereke-i menkūlesi olmamağla zevcesi merkūme Sara kendi kıbelinden asâleten ve oğlu müddei-i merkūme Ariton ile kızı müdde‘iye-i merkūme Cevri babaları ve mûrisleri mezbûrun helâkinde sagīrler olup tesviye-i emrlerine anaları mezbûre Sara savb-ı şer‘den mansûbe vasîleri olmağla mezbûrân taraflarından vesâyeten ve merkūm Hudâverdi kebîr oğulları asâleten ve mezkûre Gül dahi kebîre olmağla tarafından vekîl-i sâbitü’l-vekâlesi olan Sinan v. Kirkor nâm Ermeni vekâleten hâlik-i mezbûrun zarûret-i deyni ve sagīrân-ı mezbûrânın zarûret-i nafakaları için menzil-i mezbûrun bey‘ine savb-ı şer‘den ba‘de’l-istîzân me’zûn olmaları ile cemî‘ menzil-i mezbûr sûk-ı sultânîde müzâyede ve tâlibîne arz ettiklerinde bin üç yüz riyâlî guruşa benim üzerimde karâr edip ziyâde ile tâlib-i âhar olmadığı şer‘an mütehakkık oldukdan sonra karâr bulan bin üç yüz riyâlî guruş üzerine tahkīkan li’l-karâr yüz riyâlî guruş dahi ziyâde edip bin dört yüz riyâlî guruşa şirâya tâlib olduğumda merkūmûn Sara ve Hudâverdi ve Sinan asâleten ve vesâyeten ve vekâleten cemî‘ menzil-i mezbûru kâffe-i hukūk ve merâfıkı ile meblağ-ı mezbûr bin dört yüz riyâlî guruşa tarafeynden îcâb ve kabûlü hâvî bey‘-i bâtt-ı sahîh ile bana bey‘ ve teslîm edip ben dahi iştirâ ve kabûl ve def‘-i semen eyledim bu vechile cemî‘ menzil-i mezbûr mülk-i müşterâmdır deyu bin elli dokuz tarihiyle müverraha ve târih-i mezbûrda Rumeli kādıaskeri olup hâlâ fetvâdan ma‘zûl olan a‘lemü’l-ulemâ’i’l-izâm efdalü’l-fuzâla’i’l-fihâm hallâlü’l-müşkilâti’d-dîniyye keşşâfü’l-mu’dilâti’l-yakīniyye alemü’l-ilm ve’l-hüdâ menârü’l-fazl ve’t-tukā Kara Çelebizâde Abdülaziz Efendi hazretlerinin şer‘iyyâtcıları olan umdetü’l-müderrisîni’l-kirâm zübdetü’l-muhakkıkīni’l-fihâm Mevlânâ Dıhkî Mustafa Efendi b. Mirzâ’nın imzâsıyla mümzât ve hatemi ile mahtûme ve mazmûnu takrîrine muvâfık hüccet-i mübaya ibrâz edip müdde‘iyyûn-ı merkūmûn muvâcehelerinde feth u kırâat ve istintâk olundukda müdde‘iyyûn-ı mezbûrûndan herbiri mazmûn-ı hüccet-i merkūmeyi tav‘an mu‘terifler olduklarında i‘tirâfları üzere da‘vâ-yı meşrûhalarında mubtiller oldukları şer‘an müte‘ayyin ve mütehakkık olmağın da‘vâ-yı meşrûhalarından herbiri men‘ olunup mâ-vaka‘a bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Fahrü’l-a‘yân Mahmud Çavuş b. Hüseyin, Fahrü’l-akrân İvaz Ağa b. Hüseyin ser-muhzırân, İsmail Çelebi el-matbahî, el-Hâc Hüseyin b. Abdülmennân muhzır, Ahmed Çelebi b. Abdürrahim el-muhzır, Ahmed Çelebi b. Abdurrahman el-muhzır ve gayruhüm mine’l-[hâzırîn.]