Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 247 Hüküm no: 204 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Efendi b. İsmail’in terekesi hususunda varisleri tarafından vekil tayin edilen Ali Çelebi b. Mehmed’in zimmetinin ibra edildiği Dâru’l-hilâfeti’l-aliyye Kostantıniyye el-mahmiyye’de Çavuş Mescidi mahallesinde sâkin iken bundan akdem vefât eden Mehmed Efendi b. İsmail’in verâseti zevce-i metrûkesi Cenane bt. Abdullah nâm [hâtun] ile li-ebeveyn kız karındaşı Âişe nâm hâtuna münhasıra olduğu şer‘an zâhir ve müte‘ayyin oldukdan sonra mezbûre Cenane Hâtun tarafından husûs-ı âti’l-beyânı ikrâra vekîl-i sâbitü’l-vekâle olan umdetü erbâbi’l-belâğa Ali Efendi b. Ahmed vekâleten ve mezbûre Âişe tarafından dahi kezâlik husûs-ı âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân Osman Çavuş b. Mehmed ve Ali Bey b. Mustafa nâm kimesneler şehâdetleri [ile] şer‘an vekâleti sâbite olan Hüseyin Efendi b. Mustafa vekâleten meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-evtâdda işbu bâ‘isü’l-vesîka zahrü’l-eşbâh Ali Çelebi b. Mehmed mahzarında herbiri ikrâr-ı tâm ve takrîr-i kelâm edip merhûm-ı mezbûr Mehmed Efendi vefât eyledikde mezbûr Ali Çelebi müvekkiletân-ı mezbûretân taraflarından vekâleten muhallefât-ı müteveffâ-yı mezbûrun bazısını bey‘ ve kabz-ı semen ve bazısına dahi vaz‘-ı yed eylemişidi el-hâletü hâzihî mezbûr Ali Çelebi muhallefât-ı müteveffâ-yı mezbûrdan vaz‘-ı yed eylediği eşyâyı bi-a‘yânihâ ve semenlerinden olan makbûzâtını dahi bi-tamâmihâ müvekkiletân-ı mezbûretâna beynlerinde ma‘lûm defter-i atîk-i kassâm-ı askerî mûcebince teslîm ve müvekkiletân-ı mezbûretân Cenane ve Âişe dahi ahz ve kabz eylediler min ba‘d mezbûr Ali Çelebi zimmetinde zikrolunan defter-i atîk mûcebince muhallefât-ı müteveffâ-yı mezbûrdan bir akçe ve bir habbe hakları bâkī kalmayıp tereke-i müteveffâ-yı mezbûra müte‘allika cemî‘ de‘âvî ve mutâlebâtdan mezbûr Ali Çelebi’nin zimmetini ibrâ-i âm ile ibrâ ve ıskāt eylediler dediklerinde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Çavuş b. Mehmed, Hüseyin Çelebi b. Yusuf, Mehmed b. Ahmed, Süleyman b. Abdullah, Mehmed b. Seyfullah, Hacı Ramazan b. Süleyman, Ali b. Mustafa, Hasan b. Mehmed, Tekeli Mehmed b. Abdullah, Osman Beşe çukadâr, İsa Bey b. Ahmed.