Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 247 Hüküm no: 205 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Hacı Ali b. Şehabeddin’in Çörekçiler Kethüdası Receb Beşe b. Mahmud’da on iki bin akçe alacağı olduğu Mahmiye-i İstanbul’da Tahtakale’de sâkin çörekçi tâifesinden sâhibü hâze’l-kitâb Pîşkeşci el-Hâc Ali b. Şehabeddin meclis-i şer‘-i hatîr-i lâzimü’t-tevkīrde tâife-i mezbûre kethüdâsı olan Receb Beşe b. Mahmud nâm râcil mahzarında üzerine takrîr-i da‘vâ edip mezbûr Receb Beşe zimmetinde cihet-i karz-ı şer‘îden on iki bin râyic [fi’l]-vakt akçe hakkım vardır hattâ merkūm Receb Beşe cihet-i karzdan zimmetinde on iki bin akçe hakkım olduğuna alâ re’si’l-işhâd tav‘an i‘tirâf dahi etmişdir suâl olunup meblağ-ı mezbûrun merkūm Receb Beşe’den alıverilmesin taleb ederim dedikde gıbbe’s-suâl merkūm Receb Beşe cevâbında müdde‘î-i merkūma cihet-i merkūmeden zimmetinde ancak dört bin akçe deyni olduğuna tav‘an i‘tirâf edip mâ‘adâ sekiz bin akçesini inkâr edicek müdde‘î-i mezbûrdan da‘vâ-yı meşrûhasını mübeyyine beyyine taleb olundukda udûl-i Müslimînden mahmiye-i mezbûrede Timurtaş mahallesi sükkânından Ketenci Ahmed Çelebi b. el-Hâc Hasan ve Kasab Süleyman Çelebi b. Mustafa nâm kimesneler li-ecli’ş-şehâde meclis-i şer‘-i hatîrde hâzırân olup gıbbe’l-istişhâd herbiri münkir-i mezbûr Receb Beşe muvâcehesinde şehâdet edip fi’l-hakīka mezbûr Receb Beşe müdde‘î-i mezbûrun Tahtakale’de vâki‘ çörekçi dükkânında cihet-i karz-ı şer‘îden müdde‘î-i mezbûra zimmetinde on iki bin râyic [fi’l]-vakt akçe deyni olduğuna bizim huzûrumuzda tav‘an i‘tirâf eylemişdir mezbûr Receb Beşe’nin i‘tirâfı üzere meblağ-ı mezbûr on iki bin akçenin hâlâ merkūm Receb Beşe üzerine müdde‘î-i merkūma tamâmen edâsı vâcibdir biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra şehâdet-i mezkûre mûcebince meblağ-ı merkūm on iki bin akçeyi müdde‘î-i merkūm el-Hâc Ali’ye edâ ile merkūm Receb Beşe muvâcehesinde ilzâm olunup mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Musa Beşe b. Hüseyin, Ali Beşe b. Nasûh, Çukadâr Osman Beşe, İbrahim Beşe b. Receb, İsa Beşe b. Murad ve gayruhüm mine’l-[hâzırîn.]