Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 249 Hüküm no: 207 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola b. Dimo’nun babasından kendisine intikal eden miras hissesinin satışından alacağı olduğu iddiasıyla Yani v. Yorgi aleyhine açtığı davada iddiasını ispat edemediği Mahrûse-i Galata muzâfâtından kasaba-i Beşiktaş’da Sinan Paşa mahallesinde sâkin iken bundan akdem hâlik olan Duka v. Dimo nâm zimmînin verâseti zevce-i metrûkesi ( ) nâm Nasrâniye ile sulbiye kebîre kızı İline ve sulbiye sagīre kızı Melatina ve Marita’ya ve li-ebeveyn er karındaşı Nikola nâm zimmîye münhasıra olduğu şer‘an mütehakkık oldukdan [sonra] mezbûr Nikola meclis-i şer‘-i hatîrde işbu râfi‘ü’s-sifr Yani v. Yorgi nâm zimmî muvâcehesinde üzerine da‘vâ ve takrîr-i kelâm edip karındaşım hâlik-i mezbûrun terekesinden olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzil ve yine kasaba-i mezbûre bağları kurbünde Kaldırım ve Fundalık nâm mevzi‘lerde vâki‘ inde’l-ahâlî ve’l-cîrân ma‘lûmü’l-hudûd bağlar ve menzil-i mezbûr dâhilinde vâki‘ beynimizde adedi malum (…) ve sâir bağa müte‘allik âlâtı ba‘de helâkihî yirmi dört sehm i‘tibâr olunmağla sihâm-ı mezbûreden benim hisseme isâbet eden beş sehm hisse-i mu‘ayyene-i müfrezemi mezbûr Yani’ye yirmi bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ol dahi ba‘de’l-iştirâ ve’t-tesellüm semen-i mezbûrdan bana bir def‘a dört bin akçe ve bir def‘a dahi bin beş yüz akçe ki cem‘an [beş bin] beş yüz akçesini def‘ ve teslîm edip bâkī kalan on dört bin beş yüz akçeyi dahi taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Yani cevâbında fi’l-vâki‘ müdde‘i-i mezbûr Nikola zikrolunan menzil ve bağlarda olan beş sehm hisse-i mu‘ayyenesini bana bundan akdem meblağ-ı mezbûr yirmi bin mezbûru’n-na‘t akçeye bey‘ ve teslîm ben dahi ba‘de’l-iştirâ ve’t-tesellüm semen-i mezbûrdan dört bin akçesini mezbûr Nikola yedimden ahz u kabz edip bâkī dahi taleb eylediğinde beynimizde münâza‘ât-ı kesîre cereyânından sonra beynimize muslihûn tavassut edip semen-i mezbûrdan zimmetimde bâkī kalan on altı bin akçe da‘vâsından beni mezbûr Nikola ile bin beş yüz akçe üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûr bin beş yüz akçeyi tamâmen yedimden ahz u kabz edip mâ‘adâ olan on dört bin beş yüz akçe da‘vâsından zimmetimi ibrâ-i âm ile ibrâ ve ıskāt edip vech-i muharrer üzere sulh ve ibrâsını bin altmış üç senesi Şa‘bânü’l-mu‘azzamı’nın yirmi sekizinci gününde kasaba-i mezbûrede hilâfe-müvellâ olan Mevlânâ Halil Efendi huzûrunda ikrâr ve mevlânâ-yı mezbûr dahi vech-i muharrer üzere ikrârını ba‘de’t-tahrîr yedime hüccet-i şer‘iyyeyi vermişidi deyu def‘ ve târih-i mezbûruyla müverraha ve mevlânâ-yı mezbûrun imzâ ve hatemini hâviye ve mazmûnu min külli’l-vücûh takrîr-i meşrûhunu nâtıka hüccet-i şer‘iyye ibrâz edicek akībe’l-istintâk müdde‘î-i mezbûr Nikola mazmûn-ı hüccet-i merkūmeyi bi-tav‘ihî mu‘terif olmağın mûcibiyle bî-vech ta‘arruzdan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, İsmail Çelebi b. Yunus, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]