Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 250 Hüküm no: 208 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanos Papas’ın İncil süsleme ve yazma siparişinden kendisine borçlu olan Kazar v. Aslan ile sulh olduğu Mahmiye-i İstanbul’da Lanka kurbünde Kâtib Kasım mahallesinde sâkin Avanos Papas v. Şehri nâm Ermeni meclis-i şer‘-i hatîr-i lâzimü’t-tevkīrde mahalle-i mezkûrede sâkin Kazar v. Aslan nâm Ermeni muvâcehesinde üzerine takrîr-i da‘vâ edip bundan akdem mezbûr Kazar’a yedimde mülküm olan İncil kitâbımı tezhîb ve nakş etmek ücreti nâmına elli riyâlî guruş def‘ ve teslîm edip ol dahi yedimden ahz u kabz eylediğinden mâ‘adâ mukaddemâ kendiye yazdığım İncil kitâbı ücretinden zimmetinde iki bin fıddî râyic fi’l-vakt akçe hakkım olup zikrolunan İncil kitâbımı tezhîb ve nakş etmemekle ücret için yedine def‘ ü teslîm eylediği elli riyâlî guruş ile yazdığım İncil kitâbı ücretinden zimmetinde olan iki bin akçe hakkımı mukaddemâ kendiden taleb ve da‘vâ ettiğimde beynimizde münâza‘ât-ı kesîre vâkı‘a olmağla beynimize muslihûn tavassut edip zikrolunan elli riyâlî guruş ile meblağ-ı mezkûr iki bin akçe da‘vâsından mezbûr Kazar ile beni kırk beş riyâlî guruş üzerine sulh ettiklerinde ben dahi sulh-ı mezbûru kabûl edip bedel-i sulh olan meblağ-ı mezbûru bana teslîminden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Kazar cevâbında fi’l-hakīka müdde‘î-i mezbûrun müdde‘âsı olan elli riyâlî guruşla iki bin akçe hakkı da‘vâsından müdde‘î-i mezbûr ile beni kırk beş riyâlî guruş üzerine sulh ettiklerinde ol dahi sulh-ı mezbûru kabûl etmişidi hâlâ bedel-i sulh olan kırk beş riyâlî guruş müdde‘î-i mezbûr Avanos Papas’a zimmetimde deynimdir deyu bi-tav‘ihî ikrâr ve i‘tirâf etmeğin ikrâr mûcebince meblağ-ı mezbûr kırk beş guruşu müdde‘î-i mezbûra edâ ve teslîme mezbûr Kazar üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Abdullah, el-Hâc Ca‘fer b. Abdullah, Ahmed Çelebi b. Abdülkerim, İsmail b. Yunus, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]