Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 251 Hüküm no: 209 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyhî Ahmed Efendi b. Mehmed Efendi’nin Beyceğiz mahallesindeki evini Abdi Odabaşı b. Mustafa ile karısı Rabia Hatun bt. Memi’ye elli bin akçeye sattığı Mahmiye-i İstanbul’da Derviş Ali mahallesi ahâlîsinden fahrü’l-kuzât Şeyhî Ahmed Efendi b. Mehmed Efendi tarafından husûs-ı âti’l-beyânı ikrâra vekîl olup Ebûbekir Bey b. Ömer el-yesârî ve Ömer Beşe b. Ahmed şehâdetleri ile şer‘an vekâleti sâbite olan Ahmed Çelebi b. Mustafa meclis-i şer‘-i hatîr-i lâzimü’t-tevkīrde kendi tarafından asâleten ve zevcesi Râbia Hâtun bt. Memi tarafından ikrâr-ı âti’z-zikri tasdîka vekîl olup bi-mâ-hüve nehcü’s-sübût şer‘an vekâleti sâbite olan Abdi Odabaşı b. Mustafa mahzarında bi’l-vekâle ikrâr ve i‘tirâf edip zikri âtî akdin sudûruna değin müvekkilim mezbûr Şeyhî Ahmed Efendi’nin silk-i mülkünde muntazam yedinde mülk ve hakkı olup mahmiye-i mezkûrede Beyceğiz mahallesinde vâki‘ bir tarafdan el-Hâc Mustafa b. Zeynelâbidin mülküne ve bir tarafdan Haffâf Mustafa Çelebi mülküne ve bir tarafdan Hekîm Odaları demekle ma‘rûf odalara ve bir tarafdan tarîk-ı âmma müntehî olup dâhiliyesi iki bâb fevkānî odayı ve bir sofayı ve bir su kuyusunu ve tahta-pûşu ve matbahı ve kenîf ve havluyu ve hâriciyesi bir bâb şehnişînli odayı ve altında bir bâb odayı müştemil olan cemî‘ mülk menzilini kâffe-i hukūk ve merâfıkıyla mezbûr Abdi Odabaşı ile müvekkile-i mezbûre Râbia Hâtun’a ale’l-iştirâki-seviyye elli bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi vech-i muharrer üzere iştirâ ve tesellüm eylediklerinden sonra semeni olan meblağ-ı mezbûr elli bin akçeden herbirinin hisselerine isâbet eden yirmi beşer bin akçeyi mezbûr Abdi Odabaşı ile zevcesi müvekkile-i mezbûre Râbia Hâtun yedlerinden bi’t-tamâm ahz u kabz eyledi ba‘de’l-yevm menzil-i mezkûr mezbûr [Abdi] Odabaşı ile zevcesi mezbûre Râbia Hâtun’un ale’l-iştirâki’s-seviye mülk-i müşterâlarıdır keyfe mâ yeşâ ve yahtâr mutasarrıf olsunlar dedikde vekîl-i mezbûr Ebûbekir Bey’i vech-i meşrûh üzere cârî ve sâdır olan ikrârında mezbûr Abdi Odabaşı asâleten ve vekâleten vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Efendi b. Hasan el-imâm, Musa Dede b. Mahmud, el-Hâc Mehmed b. Ahmed, Ahmed Efendi b. Muslı el-kādî, Osman b. Ömer el-mu‘temed, İsmail b. Sinan, Kâmil Efendi b. Âlim, Ahmed Çelebi b. Halil ve gayruhüm mine’l-[hâzırîn.]