Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 252 Hüküm no: 210 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mosis v. Panos ile karısı Sultana’nın terekeleri hususunda kızı Anna’nın kız kardeşi Turhan ile sulh olduğu Mahmiye-i İstanbul’da Şeyh Ferhad mahallesinde sâkin iken bundan akdem hâlik olan Mosis v. Panos nâm Ermeni’nin verâseti zevce-i metrûkesi Sultana bt. Kirkor ve sulbiye kebîre kızları Anna ve Turhan nâm Nasrâniyelere münhasıra olup kable’l-kısme merkūme Sultana dahi hâlike olup verâseti sadriye kebîre kızları merkūmetân Anna ve Turhan’a ve li-ebeveyn er karındaşı Todor nâm Ermeni’ye münhasıra olduğu zâhir ve müte‘ayyin ve tashîh-i mes’eleleri kırk sekiz sehimden i‘tibâr olunup sihâm-ı mezbûreden yirmi üç sehmi mezbûretân Anna ve Turhan’dan herbirine ve iki sehmi mezbûr Todor’a isâbet eylediği şer‘an bâhir ve mütebeyyin oldukdan sonra merkūme Anna’nın zevcinin babası olup husûs-ı âti’l-beyânı tarafından ikrâra vekîl olduğu Mıgırdiç v. Sihak nâm râhib ve Şirvan v. Şirin şehâdetleri ile şer‘an [vekâleti] sâbit olan David v. Bali nâm Ermeni meclis-i şer‘-i hatîrde hâlikân-ı mezbûrânın kızı olup terekelerine vâzı‘atü’l-yed olan merkūme Turhan’ın zevci ve tarafından ikrâr-ı âti’z-zikri tasdîka vekîl olan işbu bâ‘isü’s-sifr Avraham v. Asvador nâm Ermeni muvâcehesinde bi’l-vekâle ikrâr ve i‘tirâf edip müvekkilim mezbûre Anna’ya babası hâlik-i mezbûr ile anası hâlike-i mezbûrenin terekelerinden isâbet eden üç sehm hisse-i şer‘iyyesini tavassut-ı muslihîn ile üç yüz beş kıt‘a riyâlî guruş ile beynlerinde cins ve kadri [ve] vasfı ma‘lûm üç yüz riyâlî guruş kıymetli Acem metâ‘ı üzerine şerâit-i sıhhat-ı sulhu hâvî ve [muvâ]za‘dan ârî tehârüc-i şer‘î tarîkı üzere sulh olup bedel-i sulh olan meblağ-ı mezbûr ile metâ‘-ı mezbûru meclis-i sulhda merkūme Turhan yedinden tamâmen ahz ü kabz edip mûrisleri hâlikân-ı mezbûrânın terekelerinden hisse-i şer‘iyyesi da‘vâsından berî olup ve müvekkile-i mezbûre Turhan’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi min ba‘d müvekkilem mezbûrenin babası ve anası hâlikân-ı mezbûrânın terekelerinden hisse-i şer‘iyyesine müte‘allika kız karındaşı müvekkile-i merkūme üzerine bi-vechin mine’l-vücûh da‘vâsı dahi yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ca‘fer Çelebi b. Abdullah, İsa Bey b. Ahmed, İsmail Çelebi b. Yunus, Süleyman Bey b. Zekeriya, İbrahim Bey b. Osman ve gayruhüm mine’l-[hâzırîn.]