Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 252 Hüküm no: 211 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çocuksuz vefat eden Zaharya v. İstalo’nun Hasköy’deki meyhanesini hayatta iken karısı İsteyo’ya hibe ettiğinin şahitlerle ispat olunduğu Mahmiye-i İstanbul’da bi’l-fi‘il beytü’l-mâl-ı âmme ve gümrük emîni olan umdetü’l-emâcid ve’l-a‘yân Siyavuş Ağa b. Abdülmennân husûs-ı âti’l-beyâna vekîl-i sâbitü’l-vekâlesi olan Mustafa Ağa b. Abdullah meclis-i şer‘-i hatîr-i lâzimü’t-tevkīrde bundan akdem mahmiye-i mezbûrede Edirnekapısı kurbünde Ali Paşa-yı atîk mahallesinde sâkin iken hâlik olan Zaharya v. İstalo nâm zimmînin zevce-i metrûkesi İsteyo bt. ( ) nâm nasâriyyeden gayrı zâhirde vâris-i ma‘rûfu ol[ma]mağla terekesinin rub‘u mezbûre İsteyo’ya ve selâse-i irbâ‘ı cânib-i beytü’l-mâle isâbet eylediği şer‘an müte‘ayyin oldukdan sonra mezbûre İsteyo’nun sadrî oğlu ve tarafından husûs-ı âti’l-beyâna vekîl olup mahalle-i mezbûre sükkânından İvaz Efendi b. Şa‘ban ve Mustafa b. Abdullah nâm kimesneler şehâdetleri ile şer‘an vekâleti sâbite olan Dimitri v. Kiryaki nâm zimmî muvâcehesinde üzerine da‘vâ ve takrîr-i kelâm edip hâlik-i mezbûrun terekesinden olup Havâss-ı Galata kazâsı muzâfâtından Hasköy’de Papasoğlu İskelesi kurbünde Yahudi mahallesinde vâki‘ bir tarafı Mustafa b. Şa‘ban mülküne ve üç tarafı tarîk-ı âmma müntehî meyhâne ta‘bîr olunur mülk menzilin ba‘de helâkihî rub‘u mezbûre İsteyo’ya ve selâse-i irbâ‘ı cânib-i beytü’l-mâle âid olmuşiken müvekkile-i merkūme İsteyo zikri mürûr eden meyhânenin cümlesine bi-gayrı hakkın vaz‘-ı yed eder suâl olunup mârrü’z-zikr meyhânenin selâse-i erbâ‘ından kasr-ı yedine tenbîh olunmak matlûbumdur dedikde gıbbe’s-suâl vekîl-i mezbûr Dimitri cevâbında fi’l-vâki‘ mârrü’z-zikr meyhâne vech-i muharrer üzere hâlik-i mezbûrun mülkü olup mülkünde olduğu hâlde hâl-i hayâtında ve kemâl-i akl ve sıhhatinde bin altmış iki Şa‘bânı’nın sekizinci gününde bi-cümleti’t-tevâbi‘ ve’l-levâhık müvekkilem mezbûre İsteyo’ya hibe-i sahîha-i şer‘iyye ile hibe ve teslîm ve temlîk ol dahi meclis-i hibede ittihâb ve kabûl ve tesellüm edip vech-i muharrer üzere hibe ve teslîmini hâlik-i mezbûr Zaharya târih-i mezbûrda Hasköy’de hîlafe-müvellâ olan Mevlânâ Ahmed Efendi huzûrunda ikrâr ve müvekkilem mezbûre dahi ba‘de’t-tasdîk mevlânâ-yı mezbûr tahrîr edip müvekkile-i mezbûrenin yedine işbu hüccet-i şer‘iyyeyi vermişidi ona binâen vaz‘-ı yed eder deyu târih-i mezbûruyla müverraha ve mevlânâ-yı mezbûrun imzâsıyla mümzât ve hatemi ile mahtûme ve mazmûnu [vechen] mine’l-vücûh takrîr-i meşrûhuna muvâfıka hüccet-i şer‘iyye ibrâz edicek akībe’l-istintâk ve’l-inkâr vekîl-i mezbûr Dimitri’den mazmûn-ı hüccet-i mersûmeyi mübeyyine beyyine taleb olundukda zeyl-i hüccet-i merkūmede muharrerü’l-esâmi Müslimînden olup zikri mürûr eden Hasköy’de Ahmed Çelebi mahallesinden sâkin Mehmed Efendi b. Mustafa el-imâm ve Abdulbâki elebi b. Ahmed el-müezzin ve Mahmud b. Hasan nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâdi’ş-şer‘î fi’l-hakīka târih-i mezbûrda hâlik-i merkūm Zaharya hâl-i hayâtında ve kemâl-i akl ve sıhhatinde meyhâne-i mahdûde-i mezbûre zevcesi müvekkile-i mezbûre İsteyo’ya bizim huzûrumuzda hibe ve teslîm ve temlîk ol dahi vech-i muharrer üzere ittihâb ve kabûl ve tesellüm eyledikden [sonra] vech-i muharrer üzere hibe ve teslîmimi hâlik-i mezbûr Zaharya târih-i mezbûrda Hasköy’de hilâfe-müvellâ olan mevlânâ-yı mezbûr Ahmed Efendi huzûrunda ve müvekkile-i mezbûre dahi ba‘de’t-tasdîk mevlânâ-yı mezbûr tahrîr edip müvekkile-i merkūme yedine işbu hüccet-i şer‘iyyeyi vermişidi biz mazmûn-ı hüccet-i merkūmeye şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcibiyle ba‘de’l-hükm vekîl-i mezbûr Mustafa Ağa bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi el-kâtib, Ahmed Efendi el-kādî, el-Hâc Receb Beşe b. Mahmud, Ramazan b. Ahmed, Mustafa Efendi b. Muharrem, İsa Bey b. Ahmed, el-Hâc Ca‘fer b. Abdullah, Osman Beşe çukadâr.