Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 254 Hüküm no: 212 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fodula Katibi İbrahim Efendi’nin Abdülfettah Ağa b. Mahmud’dan elli guruş alacağı olduğu ve at bedeli davasından men olunduğu Mahmiye-i İstanbul’da Sarıgörez kurbünde Çıkrıkçı Kemal mahallesi sâkinlerinden olup hâlâ fodula kâtibi olan umdetü erbâbi’t-tahrîr ve’l-kalem İbrahim Efendi b. ( ) tarafından husûs-ı âti’z-zikre vekîl olup Halil Efendi b. Mustafa ve Ahmed Beşe b. Ali nâm kimesneler şehâdetleri ile şer‘an vekâleti sâbite olan Mehmed Beşe b. Ahmed nâm râcil meclis-i şer‘-i hatîr-i lâzimü’t-tevkīrde medîne-i Trabzon ahâlîsinden bâ‘isü’l-kitâb Abdülfettah Ağa b. Mahmud mahzarında üzerine da‘vâ ve takrîr-i kelâm edip müvekkilim mezbûr İbrahim Efendi târih-i kitâbdan yedi sene mukaddem mezbûr Abdülfettah Ağa ile medîne-i mezbûre ahâlîsinden gāib ani’l-meclis Peltek Ali Beşe nâm kimesneye yedinden ve mâlından bin kıt‘a riyâlî guruş ikrâz ve teslîm edip mezbûrân dahi ahz u kabz ettiklerinden sonra müvekkilim mezbûrun mülk ve hakkı olan bir re’s al atını dahi mezbûrâna üç yüz riyâlî guruşa bey‘ ve teslîm onlar dahi vech-i muharrer üzere iştirâ ve kabûl ve tesellüm etmeleri ile müvekkilim mezbûrun mezbûrân zimmetlerinde cem‘an bin üç yüz riyâlî guruş hakkı olmağla meblağ-ı mezbûrdan dokuz yüz guruşunu müvekkilim mezbûr ahz u kabz edip bâkī zimmetlerinde dört yüz guruş hakkı kalmışdır suâl olunup meblağ-ı bâkī-i mezkûrdan hissesine isâbet eden iki yüz guruşun merkūm Abdülfettah Ağa’dan alıverilmesin taleb ederim dedikde gıbbe’s-suâl mezbûr Abdülfettah Ağa cevâbında müvekkil-i mezbûr İbrahim Efendi’den ben mezbûr Peltek Ali Beşe ile bin kıt‘a riyâlî guruş iktirâz ve tesellüm eyleyip dokuz yüzünü def‘ bâkī zimmetimde yüz guruş kalmışdır deyu bin riyâlî guruş iktirâzlarına i‘tirâf edip atı üç yüz guruşa iştirâlarını inkâr edicek vekîl-i mezbûr Mehmed Beşe’den mârrü’z-zikr atı müvekkil-i mezbûrun vech-i meşrûh üzere bey‘ini mübeyyine beyyine taleb olundukda ityân-ı beyyineden izhâr-ı acz ile merkūm Abdülfettah Ağa’yı istihlâf etmeğin mezbûr Abdülfettah Ağa’ya evsâf-ı mezkûre ile mevsûfe olan atı müvekkil-i merkūm İbrahim Efendi’den meblağ-ı mezbûr üç yüz guruşa iştirâ ve kabz eylemediklerine ve bu vechile üzerlerinde ve kıbellerinde müvekkil-i mezbûr İbrahim Efendi’nin hakkı olmadığına yemîn teklîf [31b] olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin vekîl-i mezbûr zikrolunan at semeni da‘vâsından men‘ olundukdan sonra mezbûr Abdülfettah Ağa i‘tirâfı üzere meblağ-ı bâkī yüz guruşdan zimmetine lâzım gelen elli riyâlî guruşu edâya merkūm Abdülfettah Ağa’ya tenbîh olunup mâ-vaka‘a bi’t-taleb ketb olundu. Tahrîren fi’l-yevmi’s-sâlis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Çavuş b. Salih, Mehmed Çavuş b. Ahmed Efendi, Mustafa Efendi b. Muharrem, Ahmed Beşe b. Ali, Ali Beşe b. ( ) çukadâr, Osman Beşe çukadâr ve gayruhüm mine’l-[hâzırîn.]