Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 255 Hüküm no: 213 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Torkatimyos b. Dimitri’nin amcası Yormanoz’un terekesinden gaspettiğini ikrar ettiği eşya ve paradan diğer varisleri olan karısı Kirano ve kızı İrine’nin hisselerini ödemesine karar verildiği Havâss-ı aliyye kazâsı muzâfâtından Midye nâm kasaba ahâlîsinden iken bundan akdem hâlik olan Yormanoz v. Torkatimyos nâm zimmînin verâseti zevce-i metrûkesi Kirano bt. Yorgi nâm Nasrâniye’ye ve sulbiye kebîre kızları İrine ve Tokita nâm Nasrâniyelere ve li-ebeveyn kız karındaşları Marola ve Dukana ve Romake’ye münhasıra olduğu ve tereke-i hâlik-i mezbûr yetmiş iki sehm i‘tibâr olunup sihâm-ı mezkûreden dokuz sehmi zevcesi mezbûre Kirano’ya ve yirmi dörder sehmi kızları merkūmetân İrine ve Tokita’ya ve beşer sehmi kız karındaşları mezkûrât Marola ve Dukana ve Romake’ye isâbet eylediği şer‘an mütebeyyin oldukdan sonra hâlik-i mezbûrun [zevcesi] Kirano kendi tarafından asâleten ve kızı mezbûre İrine tarafından husûs-ı âti’l-beyâna vekîl-i sâbitü’l-vekâlesi oldukdan sonra vekâleten meclis-i şer‘-i hatîr-i lâzimü’t-tevkīrde zevci hâlik-i mezbûrun li-ebeveyn karındaşı olup kendiden evvel hâlik olan Dimitri nâm zimmînin sulbî kebîr oğlu Torkatimyos nâm zimmî mahzarında asâleten ve vekâleten üzerine takrîr-i da‘vâ edip zevcim ve mûrisimiz hâlik-i mezbûr Yormanoz hâlik oldukda karındaşı oğlu mezbûr Torkatimyos hâlik-i mezbûrun verâseti olmak zu‘mu ile terekesinden beş bin akçe kıymetli balık ağını ve yedi bin akçe kıymetli bir kayığına ve bin beş yüz akçe kıymetli bir re’s beyâz katırını ve bin akçe kıymetli iki kebesini ve beş yüz akçe kıymetli bir tilki kürkünü ve bin sekiz yüz nakid akçesini bi-gayri vech-i şer‘î ahz u kabz eyledi suâl olunup tereke-i hâlik-i mezbûrdan nâ-hak ahz eylediği eşyâ-i mezkûre ile meblağ-ı mezbûrdan benim ve müvekkilim mezbûre İrine’nin sehmine isâbet eden hakkımızı mezbûr Torkatimyos’dan alıverilmesi matlûbumdur dedikde gıbbe’s-suâl mezbûr Torkatimyos cevâbında fi’l-hakīka ammim hâlik-i mezbûrun terekesinden verâset olmak zu‘mu ile beş bin kıymetli balık ağını ve yedi bin akçe kıymetli bir kayığını ve bin beş yüz akçe kıymetli bir re’s beyâz katırını ve bin akçe kıymetli iki kebesini ve beş yüz akçe kıymetli bir tilki kürkünü ve bin sekiz yüz nakid akçesini bi-gayrı hakkın ahz u kabz eyledim deyu bi-tav‘ihî ikrâr ve i‘tirâf edicek ikrârı mûcebince tereke-i hâlik-i mezbûrdan nâ-hak ahz eylediği eşyâdan ve meblağdan mezbûre Kirano ile müvekkilesi mezbûre İrine’nin sehimlerine isâbet eden haklarını def‘ ve teslîme mezbûr Torkatimyos’a tenbîh olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İbrahim Çavuş el-mübâşir, İsa Bey b. Ahmed, el-Hâc Ca‘fer b. Abdullah, İsmail Çelebi b. Yunus, Osman Beşe çukadâr ve gayruhüm mine’l-[hâzırîn.]