Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 256 Hüküm no: 214 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Receb b. Abdullah’ın boşanmadan önce karısı Hadice bt. Hüseyin’e ücretsiz devrettiği bakırcı dükkânını geri istemek üzere açtığı davanın geçersiz olduğu Mahmiye-i İstanbul’da Yeni Câmi‘ kurbünde sâkin el-Hâc Receb b. Abdullah mahfil-i kazâda zevce-i mutallakası işbu sâhibetü’l-kitâb Hadice bt. Hüseyin mahzarında üzerine takrîr-i da‘vâ edip Karamürsel’de vâki‘ merhûm Hazînedâr Ali Ağa Vakfı’ndan icâre-i mu‘accele ve beher mâh altmışar akçe ücret-i müeccele ile taht-ı tasarrufumda olup mahmiye-i mezbûrede Soğanağa mahallesinde vâki‘ bir tarafı Berber Ahmed Çelebi b. ( ) mülküne ve bir tarafı İbrahim Beşe b. ( ) mülküne ve iki tarafı tarîk-ı âmma müntehî bir bâb fevkānî ve bir bâb tahtânî odayı ve kenîfi müştemil olan cemî‘ menzilimi ve yine vakf-ı mezbûra beher mâh otuz akçe icâre-i müeccelesi olup menzil-i mezbûrun tahtında vâki‘ bir bâb bakırcı dükkânımı mezbûre Hadice ile zevciyyet beynimizde kāime olduğu hâlde bin altmış beş senesi Ramazânü’l-mübâreki’nin evâsıtında mezbûre Hadice[’ye] ma‘rifet-i mütevellî-i vakf-ı mezbûr ile meccânen ferâğ ve tefvîz ol dahi [tefevvuz] ve kabûl eylemişidi hâlâ tatlîk eylediğimde ferâğ-ı mezkûruma nâdim olmağla yine menzil-i mezbûr ile dükkân-ı merkūmu mezbûre Hadice’den taleb ederim suâl olunsun dedikde müdde‘î-i mezbûr el-Hâc Receb’in da‘vâ-yı meşrûhası meşrû‘a olmayıp ve mezbûre Hadice’ye suâl dahi teveccüh etmemeğin mûcibiyle mezbûr el-Hâc Receb bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-âşir min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abdülganî Efendi el-imâm, Mehmed Beşe b. Abdullah, Osman Beşe çukadâr, İsa Bey b. Ahmed, Mehmed Çelebi b. Haydar, İsmail b. Yunus ve gayruhüm mine’l-[hâzırîn.]