Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 257 Hüküm no: 215 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Muslihiddin Ağa’nın mücevher bedelinden Mustafa Bey b. Abdullah’tan altmış guruş alacağı olduğu Fazîletlü efendi hazretlerinin imzâsıyladır. İşbu bâ‘isetü’l-vesîka İsmihan Hânım bt. Muslihiddin Ağa mahfil-i kazâda Saray-ı atîk-i sultânî teberdârlarından Mustafa Bey b. Abdullah mahzarında üzerine takrîr-i da‘vâ edip mukaddemâ silk-i mülkümde münselik olan bir zümrüd taşlı altın hâtemi işbu hâzırân bi’l-meclis Sinan Çelebi nâm kimesne ile Saya bt. Yani nâm Ermeniye yedleriyle mezbûr Mustafa Bey îdâ‘ ve teslîm ol dahi ba‘de’l-istîdâ‘ ve’l-kabz ol hâtemi benden altmış beş kıt‘a riyâlî guruşa iştirâ ve kabûl eyledikden sonra hatta ol hâtemi vech-i muharrer üzere iştirâ ve kabûlünü ve semen-i mezbûr zimmetinde bana deyn olduğunu alâ re’si’l-işhâd ikrâr etmişiken meblağ-ı mezbûru mezkûr Mustafa Bey bana teslîminden imtinâ‘ eder suâl olunup alaverilmesi matlûbumdur dedikde gıbbe’s-suâl mezbûr Mustafa Bey cevâbında sâlifü’z-zikr hâtemi müdde‘iye-i mezbûreden mezbûrân yedleriyle istîdâ‘ ve kabz edip lâkin yedimde zâyi‘ olmuşdur deyu vech-i muharrer üzere semen-i mezbûra iştirâ ve kabûlünü inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden olup mahmiye-i İstanbul’da Molla Kestel mahallesi sükkânından Mustafa Bey b. Ahmed Çavuş ve el-Hâc Mehmed b. Ahmed nâm kimesneler li-eci’ş-şehâde meclis-i şer‘a hâzırân olup isre’l-istişhâd fi’l-vâki‘ işbu Mustafa Bey müdde‘iye-i mezbûre İsmihan’ın mülkü olup yedimde vedî‘at olan bir zümrüd taşlı altın hâtemi müdde‘iye-i mezbûreden altmış beş riyâlî guruşa iştirâ ve kabûl eyledim el-ân meblağ-ı mezbûr altmış beş riyâlî guruş mezbûre İsmihan’a zimmetimde edâsı vâcib deynimdir deyu huzûrumuzda ikrâr eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde şâhidân-ı mezbûrân mahalleleri ahâlîsi Ali Çelebi el-müezzin ve Mirzâ ve Osman Ağa ve Süleyman Beşe ve Üstâd Mustafa Beşe ve Ali Beşe ve Hamza Beşe ve Bâli Çelebi ve Mustafa Beşe ve Mehmed Bey el-cündi ve el-Hâc Ali nâm kimesneler ile ta‘dîl ve tezkiye olunduklarından sonra şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fî evâsıtı Şevvâli’l-mükerrem li-sene seb‘a ve sittîn ve elf. Şühûdü’l-hâl: Hâcı Dilaver b. Abdullah, İsa Bey b. Ahmed, Ahmed Çelebi, Abdurrahman, Osman Beşe, Mustafa Efendi b. Mehmed ve gayruhüm mine’l-[hâzırîn.]